Ыалдьыттары оптуобуһунан экскурсиялатыахтара

«Азия оҕолоро» Оонньууларга бэлэмнэнии чэрчитинэн Олохтоох дьаһалта урбааҥҥа, потребительскай ырыынакка уонна туризмы сайыннарыыга департамена СӨ маркетиҥҥа уонна туризмы сайыннарыыга агентствотын кытта туристарга 3 маршруту бэлэмнээтилэр – «Якутск музейный», «Путешествие в Вечную мерзлоту» оптуобус маршруттара уонна «Знакомство с городом Якутском» сатыы маршрут.
Бэлиэтээн эттэххэ, «Азия оҕолоро» Оонньууларга бэлэмнэнии иитинэн быйыл Олохтоох дьаһалта СӨ геокултуурунай сайдыыга институтун кытта 30 идэтийбит гид-экскурсоводы бэлэмнээтилэр.
Санатар буоллахха, Олохтоох дьаһалта «АРТиТМ» ГАУ уонна PressPass коммуникационнай агентствоны кытта туристарга анаан бу иннинэ Дьокуускай кэрэ-бэлэиэ миэстэлэрин билиһиннэрэр ыйынньыктары бэлэмнээбитэ. Дьокуускай кэрэ-бэлиэ миэстэлэрин – музейдарбытын, ирбэт тоҥмутун о.д.а. – билиһиннэрэр босхо ыйынньыктар ыалдьыттары көтөн кэлэр сөмөлүөттэригэр, түһэр гостиницаларыгар, маҕаһыыннарга, спорт комплекстарыгар күүтүөхтэрэ. Ол эбэтэр киэн туттар, дьоҥҥо-сэргэҕэ көрдөрүөхпүтүн баҕарар сирдэрбитин эрдэттэн билсэн саҕалыахтара. Оттон каарта-схема үс сүрүн маршруттан турар: «Знакомство с Якутском», «Экскурсия в мерзлоту» уонна «Якутск музейный». Ыйынньыгы ыалдьыттар дойдуларыгар илдьэ баран, Сахабыт сирин уонна кини киин куората Дьокуускайбыт историятын, култууратын, археологиятын, этнографиятын, сиэрин-туомун, үгэстэрин туһунан өйдүү-саныы сылдьаллара саарбаҕа суох.