«Якутия» технопарка резиденнэрэ Smart-кинигэ оҥордулар

«МультиДиТек» хампаанньа «Futurebooks3d» бырайыагынан бөдөҥ шрифтээх оҕо аныгы кинигэтин оҥордо. Таһаарыы СӨ Үүнэр көлүөнэлэрин пуондатын көмөтүнэн күн сирин көрдө.

«СӨ Үүнэр көлүөнэлэрин пуондатын иһинэн ураты тыастаах, бөдөҥ шрифтээх уонна визуализацияламмыт интерактивнай кинигэни оҥорон таһаардыбыт. Кинигэ ордук мөлтөхтүк көрөр, мөлтөхтүк истэр оҕолор сайдыыларыгар улахан туһалаах уонна ордук көдьүүстээх буолуоҕа. Бу кинигэ оҥоһуллан тахсарыгар АХШ Хотугу Каролинатыттан Дьюк чинчийэр университет преподавателэ Зумрад Ахмеджанов уонна бырайыак ааптара, биһиги биир дойдулаахпыт, АХШ Хотугу Каролинатын аан дойдутааҕы оскуолатыгар нуучча тылын преподавателэ Лия Льюис улахан өҥөлөөхтөр диэн бэлиэтиэхпин баҕарабын», – диэн бырайыак көҕүлээччитэ Таисия Тарабукина иһитиннэрэр.

Таисия Тарабукина салайааччылаах «МультиДиТек» IT-хампаанньа 3D босуобуйалары оҥорор. Кумааҕы кинигэни уонна саҥа технологиялары холбоон, анал сыһыарыы көмөтүнэн оҕо болҕомтотун тардар кинигэлэри айар. Кини кинигэлэрэ 3D контеннаахтар, аудиолаахтар, тиэкистэрин улаатыннарар, ойууларын саҥардар кыахтаахтар.