«Якутия» авиахампаанньа сөмөлүөттэри бэйэтэ өрөмүөннүөҕэ

Быйыл «Якутия» авиахампаанньа аан бастакы төгүлүн Boeing-737 уонна Bombardier Q300 сөмөлүөттэри бэйэтэ өрөмүөннүөҕэ. Ол туһунан  «Якутия. Live» биэриигэ авиахампаанньа генеральнай дириэктэрэ Андрей Винокуров иһитиннэрдэ.
«Кулун тутар саҕаланыытыгар омук сөмөлүөттэрин «техобслуживаниетын» оҥорорго Арассыыйа авиациятын уорганнарын биһирэбиллэрин ылбыппыт. Быйыл бэйэбит бастакы дьоһун өрөмүөнү оҥорору былаанныыбыт. Ити биһиэхэ ураты эппиэтинэһи сүктэрэр, хамаандабыт уопуттаах уонна үрдүк квалификациялаах», - диэтэ Андрей Винокуров.
Кини бэлиэтээбитинэн, авиахампаанньа бэлэмнэниини ыытар уонна эбии тэрили атыылаһар. Саппаас чаастары үһүс дойдулар нөҥүө атыылаһаллар. Урукку өттүгэр саппаас чаастары Америкаттан уонна Европаттан Москванан үс хонук иһигэр аҕалар буоллахтарына, бүгүҥҥү күҥҥэ аҕалыы болдьоҕо 60 күҥҥэ диэри уһаабыт. 
«Саамай сүрүнэ – көтүү куттала суох буолааһына, быраабылалары чопчу тутуһуу. Саппаас чаастар бары «оригинал» буолуохтара», - диэн эрэннэрдэ авиахампаанньа салайааччыта.