«Якуцкъ» суудунаҕа экскурсиялар ыытыллыахтара

«Дьокуускайдааҕы музей суудунаҕа интерактивнай экскурсиялары, хаартыскаҕа түһэр миэстэни уонна үөрэх дьарыктарын тэрийэри былаанныыр. Суудунаны хайдах туһанар туһунан элбэх идиэйэ баар. Хаарабыл пааспардаах, ууга устарга тэриллэрдээх. Саҥа эбийиэккэ элбэх айар бырайыак олоххо киирэригэр баҕарабыт», – диэтэ өрөспүүбүлүкэ култуураҕа уонна духуобунай сайдыыга миниистирин бастакы солбуйааччыта Владислав Левочкин.

Билигин музейга Арассыыйа филателистарын Сойууһун бочуоттаах чилиэнэ,   яхтсмен-хапытаан Сергей Кочеводов чааһынай коллекциятыттан 18-19 үйэлэрдээҕи сэрии сэбин, ол саҕанааҕы таҥаһы-сабы уо.д.а. атын экспонаттары көрүөххэ сөп.

«Якуцкъ» суудуна Улуу хотугу экспедиция чинчийэр хараабылын куопуйата. Историческай суолтата – итинник хараабылынан Өлүөнэ эбэ тардыытыгар хапытаан Василий Прончищев уонна штурман Семен Челюскин устан кэлбиттэрэ буолар.

Суудуна Саха сиригэр быйыл от ыйыгар кэлбитэ.