XI-с ыччат дьыалабыай оонньуута түмүктэннэ

Кыттааччылар, куорат баһылыга Евгений Григорьев бэрэссэдээтэллээх дьүүллүүр сүбэ иннигэр, Дьокуускай куоракка 2032 сылга диэри туризм сайдыытыгар туһуламмыт бырайыактарын көмүскээтилэр.

«МЭР» («Ыччат – Дьокуускай куорат сайдыытын энергията») XI-с ыччат дьыалабыай оонньуутугар 13 хамаанда күрэхтэстэ – куорат уокуругун тэрилтэлэрин 80 эдэр исписэлииһэ, орто уонна үрдүк үөрэх кыһатын 18 сааһыттан 35-гэр диэри устудьуоннара уонна ыччат уопсастыбаннай тэрилтэлэрин бэрэстэбиитэллэрэ.

Уопсай түмүгүнэн, «МЭР-2023» оонньуу кыайыылаахтарынан буоллулар:

1-кы миэстэ – «Аптаах ойуур» кыһыҥҥы паарка» бырайыактаах хамаанда, хамандыыр Егор Прокопьев, Киин уокурук Управатын нэһилиэнньэни кытта үлэҕэ сүрүннүүр исписэлииһэ;

2-с миэстэ – «Полярный круг Якутии» этнопаарка» бырайыактаах хамаанда, хамандыыр Иннокентий Киренскэй, М.К. Аммосов аатынан ХИФУ устудьуона;

3-с миэстэ – «Фтизиатрия» научнай практическай киин СӨ СБТ «Ус кут» төгүрүк сыл үлэлиир туристическай комплекс» бырайыактаах хамаандата, хамандыыр Ирина Потапова, «Фтизиатрия» научнай практическай киин СӨ СБТ провизора.  

Оонньуу бастыҥ лиидэринэн «Саханефтегазсбыт» АУо үпкэ салаатын сүрүннүүр исписэлииһэ Игорь Лемешев талылынна. Кини үрдүк таһымнаахтык салайар дьоҕурун, дьоһун быһаарыыны ылынарын көрдөрдө.  

«Ыччат – Дьокуускай куорат сайдыытын энергията» XI-с дьыалабыай оонньуу киин куорат ыччатын ураты талаанын, айар уонна хамаандаҕа үлэлиир дьоҕурун, идэтийиитин таһымын арылхайдык көрдөрдө.

Оонньуу тэрийээччилэрэ – Олохтоох дьаһалта Уопсастыбаннай сибээскэ уонна ыччат политикатыгар, итиэннэ Каадырга уонна муниципальнай сулууспаҕа управлениелара.