Волонтер оҕолору үөртэ

Куорат олохтооҕо Василий Галуза Гагаринскай уокурукка оҕолорго аналлаах сыыр тутта. Ыччат уонна дьиэ кэргэн политикатын управлениета иһитиннэрбитинэн, Василий – Дьокуускай куорат ыччатын палаататын чилиэнэ, Мииринэй дьокутааттарын сэбиэтин дьокутаата уонна волонтер.

«Сэтинньигэ Гагаринскай уокурук управлениета оҕо сыырын туруорарга көмө көрдөөбүтэ. Уокуругу кытта ыкса ситимнээхтик үлэлиибин, онон көрдөһүүнү быһа гымматаҕым. Ыччакка аналлаах дьыаланы мэлдьи өйүүбүн. Биһиги сыырбыт Гагаринскай уокурук оҕолорун хаһыс да нэдиэлэтин үөрдэриттэн дьоллоохпун», – диир кини уонна спонсор буолбут «Металл Торг» хааччахтаммыт эппиэтинэстээх тэрилтэҕэ махтанар.

Василий Галуза туһунан сиһилии 17-с балаһаҕа аах.

Дьокуускай куорат уокуругун Ыччакка уонна дьиэ кэргэн политикатыгар управлениета куорат олохтоохторун волонтердар иллээх-эйэлээх хамаандаларын хаҥатаргытыгар ыҥырар. Сайаапкаларгытын upravlenie.mol@gmail.com электроннай почтаҕа ыытаргытын күүтэллэр.