Владимир Путин регионнарга дьиэ кэргэни өйүүр бырагыраамалары кэҥэтэллэригэр эттэ

«Элбэх оҕолоох ыаллар – Арассыыйа инники кэскилин олуга уонна тыһыынчанан сыллаах историятын салгыыта. Регионнар кинилэри өйүүр бырагыраамалары кэҥэтиэхтээхтэр”, – диэн РФ Бэрэсидьиэнэ Владимир Путин «Төрөппүт албан аата» уордьанынан наҕараадаламмыт дьиэ кэргэттэри кытта онлайн көрсүһүүгэ эттэ. 
«Регионнар, олохтоох былаастар бэйэлэрин өттүлэриттэн дьиэ кэргэни, бастакы уочарат элбэх оҕолоох ыаллары  өйүүр бырагыраамалары кэҥэтиэхтэрэ диэн эрэнэбин. Кинилэр кыһалҕаларыгар уонна көрдөһүүлэригэр суһаллык харда биэриэхтээхтэр», - диэн эттэ судаарыстыба баһылыга. 
Президент эппитинэн, дьиэ кэргэн өйөбүлүн кытта үөрэҕирии хаачыстыбатын үрдэтиигэ үлэ быһаччы сыһыаннаах. Итиннэ кыра куораттарга уонна тыа сиригэр тутуу, оскуолалары, оҕо уһуйааннарын саҥардыы эмиэ киирэр. 

«Оҕо сайдарыгар, олоххо бэйэтин миэстэтин буларыгар, дьоҕурун арыйарыгар, киһи буолан атаҕар турарыгар хас биирдии киһиэхэ, гражданиҥҥа киэҥ эйгэ тэриллиэхтээх», - диэн Путин эбэн эттэ.
Ыам ыйын 1  күнүгэр Владимир Путин элбэх оҕолоох ыалларга ипотека чэпчэтиитин кэҥэтэр туһунан сокуоҥҥа илии баттаабыта. Онно этиллэринэн, бииргэ үбүлээһин судаарыстыбаннай бырагырааманан 450 тыһыынча солкуобай бэриллэр. Докумуоҥҥа суруллубутунан, ити үбү дьиэ туттарга уонна ситэ тутуллубатах дьиэни атыылаһарга тутталлар. 
2021 сылтан ийэ хапытаала бастакы оҕоҕо 483 882, оттон иккис оҕоҕо 639 432 солкуобайга диэри үрдээбит. Бу харчыны дьиэ атыылаһарга эбэтэр туттарга, үөрэҕи төлүүргэ, ийэ биэнсийэтин мунньуллар чааһыгар, инбэлиит оҕолорго табаардары уонна өҥөлөрү атыылаһарга туттуохха сөп.