29.11.2021 | 13:00

«Вкус Якутии» бэстибээл саҕаланна

«Вкус Якутии» бэстибээл саҕаланна
Ааптар: Киин Куорат
Бөлөххө киир

«Кыһын Саха сириттэн саҕаланар» бэстибээл чэрчитинэн сэтинньи 27 күнүгэр «Вкус Якутии» 8-с гастрономическай бэстибээл үөрүүлээх быһыыга-майгыга арылынна. Быйыл Дьокуускай 12 бастыҥ ресторана киин куорат олохтоохторугар уонна ыалдьыттарыгар саха национальнай, Хотугу уонна Арктика норуоттарын аһын-үөлүн аныгылыы көрүҥнээх амсатыахтара. 
Бэстибээл аһыллыытыгар «Атласовтар уһаайбалара» этнографическай комплекска СӨ предпринимательствоҕа, атыыга уонна туризмҥа миниистирэ Ирина Высоких, Дьокуускай куорат баһылыгын солбуйааччы Антон Алексеенко, куораттааҕы Дуума бэрэссэдээтэлин бастакы солбуйааччы Евдокия Евсикова, олохтоох дьаһалта предпринимательствоҕа, потребительскай ырыынакка уонна туризм сайдыытыгар Департаменын начаалынньыга Ирина Седова кыттыыны ыллылар.
«Саха сирин олохтоохторо сөбүлээбит тэрээһиннэрэ – «Вкус Якутии» саҥа ис хоһоонунан уонна шеф-повардар саҥа айымньыларынан туолар. Саха норуотун баай култуурата аныгы олохпут сорҕото буолар, Дьокуускай шеф-повардара үгэһи тутуһан туран национальнай куукунаны аныгылыы саҥардан биэрэн мэлдьи сөхтөрөллөр», – диэн бэлиэтээтэ  Ирина Высоких.
Дьокуускай куорат баһылыгын солбуйааччы Антон Алексеенко күрэх кыттааччыларыгар ситиһиини баҕарда уонна тэрийээччилэргэ махталын тириэртэ. «Биһиги билигин аһылыкка эрэ буолбакка, дьоҥҥо уонна култуурабытыгар сыһыаннаах бэртээхэй бэстибээл кыттааччылара буоллубут», – диэтэ  кини.
Экспертэр дьүүллэригэр «Атласовтар уһаайбалара» этнографическай комплекс шеф-повара Николай Атласов авторскай сет-менюта тахсыбыт. Испииһэккэ эт уонна балык бүлүүдэлэр, соботтон пельменнэр, сылгы этиттэн оҕуруот астаах фирменнэй бүлүүдэ бааллар. 
«Эт уонна балык тэриэлкэлэри сөбүлээтибит, уонна биллэн турар, сылгы этин, олохтоох национальнай бүлүүдэлэр наһаа минньигэстэр. Сет-менюну амсайаат өрөспүүбүлүкэни бүтүннүү кэрийбит курдук сананныбыт», – диэн Мексикаттан ыалдьыттар Сарате Эрик Иуридиан уонна Оксана Моргунова санааларын үллэһиннилэр. Кинилэр Саха сирин туһунан кэккэ биэриини оҥороллор. 
Куонкурус 8 күнүн тухары экспертэр жюрилара – шеф-повар Николай Габышев, СӨ предпринимательствоҕа, атыыга уонна туризмҥа миниистирэ Ирина Высоких, Дьокуускай куорат баһылыгын солбуйааччы Антон Алексеенко, олохтоох дьаһалта предпринимательствоҕа, потребительскай ырыынакка уонна туризм сайдыытыгар Департаменын начаалынньыга Ирина Седова, АГАТУ преподавателэ, «WorldSkills Russia» экспердэ Кира Иванова уонна СӨ ыалдьытымсах буолууга  Ассоциациятын бэрэссэдээтэлэ Татьяна Тымырова куонкуруска кыттар бүлүүдэлэри сыаналыахтара. 
Быйыл «Вкус Якутии» бэстибээлгэ киин куорат бастыҥ рестораннара –«Атласовтар уһаайбалара», «Kitchen», «Huston», «Мацури», «Леман», «Чочур Мураан», «Крыша», «Rooms», «Зеленый город», «Каре», ону сэргэ «Орто Дойду» туристическай комплекс уонна «Урдэл» сынньалаҥ паарката кытталлар.
Санатар буоллахха, гастрономическай бэстибээл көҕүлээччитинэн 2014 сылга, оччолорго куорат баһылыга, Айсен Николаев буолбута. 2016 сыллаахха бэстибээл  «Russian Event Awards-2016» туризм салаатыгар Национальнай бириэмийэ гран-при хаһаайынынан буолбут. 
Бэстибээл түмүгэ ахсынньы 5 күнүгэр тахсыаҕа. 
Тэрээһин куттал суох буолуу миэрэлэрин барытын тутуһан, киириигэ булгуччу QR-коду бэрэбиэркэлээһиннээх ыытыллар.

Сонуннар

Ордук ааҕаллар

Дьоҕур-талаан арыллыыта
Спорт | 26.01.2023 | 18:00
Дьоҕур-талаан арыллыыта
Дьиҥинэн, Орто дойдуга кэлбит киһи барыта туохха эрэ дьоҕурдаах, талааннаах. Дьэ, ол арыллара, туттуллара дэбигис кыаллыбат. Ону үрдүк үөһээ айыыларбыт бэйэлэрэ быһааран эрдэхтэрэ. Биллэн турар, улаханнык сыраластахха, күнү-дьылы бараатахха, сүрэхтээх-бэлэстээх, туруу үлэһит, айылҕаттан айдарыылаах буоллахха эрэ дьоҕур, талаан кэлиэн сөп. Дьөгүөр Картузов, дьэ, кырдьык, айылҕаттан хатаҕаламмыт киһи. Тыа киһитин сиэринэн...
Сардаана Токоемова:  «Иистэн дуоһуйууну ылабын...»
Дьон | 28.01.2023 | 16:00
Сардаана Токоемова: «Иистэн дуоһуйууну ылабын...»
Иис сахаларга урут-уруккуттан хааммытыгар баар. Билигин биһиги ортобутугар талааннаах иистэнньэҥнэр, норуот маастардара аҕыйаҕа суохтар. Кустуктуу субуллар оһуор быысапкалары, сахалыы тыынынан илгийэр кылтан, сиэлтэн оҥоһуктары, туостан көбүөрдэри, сэлээппэлэри, халадаай былаачыйалары, оноолоох соннору, хаһыаччыктары о.д.а. саха дьахталлара ис сүрэхтэриттэн тигэллэр. Бу тигиилэргэ төһөлөөх дууһа сылааһа ууруллубута буолуой диэн киһи сөҕө эрэ саныыр....
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Куорат олоҕо | 01.02.2023 | 17:00
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Дьокуускай куорат историятыгар аан бастаан 990 миэстэлээх улахан оскуола аны күһүн үлэҕэ киириэхтээх.  990 миэстэ диэн бырайыактаммытынан уйунар кыаҕа буоларын өйдүөххэ наада. Киин куораппытыгар миэстэ тиийбэт кыһалҕата баарын тухары оскуолаларбыт 2-3 төгүл ноҕоруускалаах, иккилии симиэнэнэн үлэлии олоруохтара турдаҕа. Онон бу саҥа оскуолаҕа балтараа тыһыынчаҕа тиийэ оҕо үөрэнэрэ буолуо диэн барыллаан...
Көмө мүнүүтэ да тохтообот
Дьон | 03.02.2023 | 12:00
Көмө мүнүүтэ да тохтообот
Аҕа дойду Улуу сэриитин кэмигэр Саха сирин дьоно-сэргэтэ төһө да тыһыынчанан килэмиэтиринэн ыраах олордоллор, өйдөрө-санаалара Кыайыы эрэ туһугар сытара. Биир дойдулаахтарбыт харчынан, облигациянан, үрүҥ көмүһүнэн, кыһыл көмүһүнэн, балыгынан, күндү түүлээҕинэн о.д.а. көмөнү хара көлөһүннэрин тоҕон туран фроҥҥа ыыппыттара. Ийэлэрбит, эбэлэрбит ыарахан үлэлэрин быыһыгар төһөлөөх кээнчэни, үтүлүгү тигэн ыыппыттарай! Дэлэҕэ сэрии...