Уус Алдан Спартакиадаҕа бэлэмнэнэр

Бэҕэһээҥҥи төгүрүк остуол иккис түһүмэҕэр Уус Алдан дьаһалтатын баһылыга А.В. Федотов уонна кини солбуйааччылара, Бороҕон нэһилиэгин дьаһалтатын баһылыга В.И. Аммосов кыттыыны ыллылар. 
Кинилэр Өрөспүүбүлүкэ 100 сылыгар ананан ыытыллыахтаах СӨ норуоттарын VIII Спартакиадатыгар бэлэмнэнии хайдах бара турарын билиһиннэрдилэр. Ким туох этиилээҕин иһиттилэр. 
Улууска 2013 сылтан 72 эбийиэк үлэҕэ киирбит. Улахан тутуулар баралларыгар эрдэттэн ууну, уоту, итиини, суолу тэҥҥэ оҥорор туһунан бырайыак ситэн-хотон, 33 эбийиэккэ тутуу уонна хаттаан саҥардан оҥоруу  үлэлэрэ саҕаланнылар. 
Бастатан туран, бөһүөлэк ортотугар улахан спорт комплекса тутуллуоҕа, ити аттыгар болуоссакка Лөгөй аата иҥэриллиэҕэ. Дьоруойдар аллеялара саҥардыллыаҕа, уулуссалар кэҥэтиллиэхтэрэ. Урукку Аал Луук Мас хос оҥоһуллуоҕа. Ол аттыгар 4 миэтэрэ үрдүктээх Майаҕатта Бэрт Хара пааматынньыга туруоруллуоҕа. “Алаас халыҥ хахха буолар күүстээх-уохтаах хаһаайыннаах буолуохтаах, – диир баһылык Алексей Васильевич. – Бу өрөспүүбүлүкэҕэ киэҥник биллибит боотурбут кутуттан кэлэр-барар спортсменнар, дьон алгыс, күүс-уох ылар, көрдөһөр сирдэрэ буолуоҕа”. 
Урукку өттүгэр Тойон Мүрү туонатыгар I спортивнай оонньуулар уонна Олоҥхо ыһыаҕа ыытыллыбыта. Онон нэһилиэнньэ уопуттаах, бу да сырыыга тэрээһин үрдүк таһымнаахтык, санаа хоту барарыгар эрэллээхпит.