Ураа! Оскуола аһылынна!

Самаан сайыммыт бүтэн, көтөҕүнэн кэһиилээх көмүс күһүммүт тиийэн кэллэ. Куорат иһэ оҕо саҥатынан туола түстэ.

Сибэкки дьөрбөлөөх, үрүксээк сүгэһэрдээх кыргыттар

Аҕас-балыс Юмшановтар сайыҥҥы сынньалаҥнара түмүктэннэ. Үөрэх дьыла саҕаланна!

6 саастаах Юлиана – "Парус" оҕо уһуйаанын "Күөрэгэй" бэлэмнэнии бөлөҕүн иитиллээччитэ. Хаартыскаҕа сибэкки дьөрбөтө тутуурдаах уһуйааҥҥа бараары турарын көрөҕүт. 

Эдьиийэ Сима Дьокуускай куорат 2-с №-дээх оскуолатын 3 “А” кылааһыгар үөрэнэр. Бу күннэргэ саҥа үрүксээгин сүкпүтүнэн сырытта. Сайыҥҥы сынньалаҥ кэмигэр кыысчаан үөрэнэ барарын долгуйа күүттэ. Эрдэ түспүт хаһыҥ, хата, анаабыт курдук, астралары тыыппатах. Онон бэҕэһээ Сима сайын устата бүөбэйдээбит сибэккитин учууталыгар Надежда Афанасьевнаҕа бэлэхтээтэ.

Дорообо, оскуола!

Света Адамова Мииринэй улууһун Таас Үрэх бөһүөлэгэр олорор. Кини быйыл маҥнайгы кылааска киирдэ.

Кыысчаан оскуолаҕа барарын сайыны быһа кэтэстэ. Буукубаларын билэр. Эдьиийдээх убайа, ийэтэ, аҕата үөрэппиттэрэ. Дьоно буккуйумаары аахтара сатаабатылар.

Кылаастарыгар сэттиэлэр, алта кыыс, соҕотох уол. Света сайын устата улаатан хоройдо. Онон кыргыттартан уҥуоҕунан үрдүк.

Учууталлара Таас Үрэххэ быйыл саҥа көһөн кэллэ. Аата – Копырина Ия Николаевна.

Ыал улахана, икки кыыс эдьиийэ

Нелли Тарасова – Дьокуускай куорат 7 №-дээх оскуолатыгар 2 «Е» кылааһын үөрэнээччитэ. Сайын Кыыс Аммаҕа дуоһуйа сынньанна, ып-ыраас өрүскэ чомполоно сөтүөлээтэ. Онон үөрэнэргэ күүс-уох эбиннэ.

Нелли – ыал улахан оҕото. Икки балтылаах. Ийэлээх аҕатын сэмэй ситиһиитинэн үөрдэргэ, кырачаан балыстарыгар үтүө холобур буоларга кыһаллар.  

Намыына

Намыына Сорокина Дьокуускай куорат 38 №-дээх оскуолатыгар үөрэнэр. Быйыл иккис кылаас буолла. Былырыын балаҕан ыйын 1 күнүгэр оскуолаҕа барбытын бу баардыы өйдүүр.

Намчы кыыс Намыына форматын кэтэн, күн аайы оскуолатыгар үөрэ-көтө тиийиэҕэ. Кинилэр кылаастарыгар 37-лэр. Билигин икки бөлөххө арахсан үөрэнэр буоллулар. Учууталларын аата – Наталья Анатольевна Семенова.

Дьиэ кэргэн алгыһынан

Көмүс күһүн билии-сайдыы аартыгар угуйда. Үөрэх сырдык кыһата оҕолору ыҥырда. Г.И. Чиряев аатынан Бүлүү 1 №-дээх орто оскуолатын 6 "А" кылааһын үөрэнээччитэ Анита Харлампьева дьиэ кэргэнин алгыһынан үөрэх дьылын саҕалаата.