Уопсастыбаннай тырааныспар боппуруоһа болҕомто кииниттэн тахсыбат

Куорат уопсастыбаннай палаатата “Суол-тырааныспар сулууспата” МХТ салайааччыта Эдуард Садовниковы кытта оптуобустар маршуттарын тэрийии боппуруоһун дьүүллэстэ.
Уопсастыбаннай палаата бэрэссэдээтэлэ Матвей Лыткин ыҥырыытынан мунньахха ГРЭС, 202-с, 203-с .о.д.а. дьоҕус оройуоннар олохтоохторо кыттан, санааларын үллэһиннилэр, этиилэрин туруорустулар. 
«Уопсастыбаннай палаата буоларбыт быһыытынан, уопсастыбаннастан, ол эбэтэр нэһилиэнньэттэн чуолаан куорат оптуобустарын сырыытыгар сыһыаннаах элбэх этии киирэр. Холобура, 1 №-дээх оптуобуһу элбэх нэһилиэнньэлээх уонна производственнай тэрилтэлээх ГРЭС оройуонугар төнүннэриини туруорсаллар», - диир Матвей Лыткин.
“Суол-тырааныспар сулууспата” МХТ салайааччыта Эдуард Садовников Уопсастыбаннай палаата мунньаҕа көтөхпүт, нэһилиэнньэни уопсастыбаннай тырааныспар өҥөтүнэн хааччыйыы хаачыстыбатын үрдэтиигэ атын даҕаны этиилэри тохсунньу 26 күнүгэр куорат уонна куорат таһынааҕы нэһилиэктэргэ оптуобус сырыытын чинчийэр хамыыһыйа мунньаҕар көрөр былаан баарын иһитиннэрдэ, диэн Олохтоох дьаһалта пресс-сулууспата иһитиннэрэр.