Уопсастыбаннай палаата уонна «СӨ норуоттарын ассамблеята» сөбүлэҥҥэ илии баттаатылар

Олохтоох дьаһалта миграционнай боппуруостарга уонна национальнай-култуурунай холбоһуктары кытта үлэҕэ уопсастыбаннай сэбиэтин мунньаҕар Уопсастыбаннай палаата уонна «СӨ норуоттарын ассамблеята» уопсастыбаннай хамсааһын бииргэ үлэлээһин туһунан сөбүлэҥи түһэристилэр. Сөбүлэҥҥэ Уопсастыбаннай палаата бэрэссэдээтэлэ Матвей Лыткин уонна уопсастыбаннай хамсааһын салайааччыта Александр Подголов  илии баттаатылар.

Куорат баһылыгын солбуйааччы – Олохтоох дьаһалта аппараатын салайааччыта Руслан Тимофеев мунньахха Саха АССР 100 сылыгар, Дьокуускай куорат 390 уонна киин куорат бастакы бэрэстэбиитэллээх уоргана төрүттэмммитэ 200 сылларыгар анаммыт тэрээһиннэр түмүктэрин таһаарда.

«Дойду бэрэсидьиэнэ 2023 сылы Настаабынньык уонна педагог сылынан биллэрдэ – ити учуутал идэтин үрдүк уопсастыбаннай суолтатын бэлиэтэ. Итинэн сибээстээн Уопсастыбаннай палаата саҥа талыллыбыт састаабын ыччаты уопсай үтүө дьыалаҕа угуйарга настаабынньыктыырга ыҥырабын», - диэн бэлиэтээтэ Руслан Тимофеев.          

Мунньахха Олохтоох дьаһалта миграционнай боппуруостарга уонна национальнай-култуурунай холбоһуктары кытта үлэҕэ уопсастыбаннай сэбиэтэ 2023 сыллааҕы былааннарын дьүүллэстилэр.