Учуутал, эн үрдүк ааккар сүгүрүйэбит!
Ытыктыыр учууталбыт Саргылаана Васильевнаны Учуутал күнүнэн эҕэрдэлиибит!
Эн биһиэхэ ийэлии истиҥ сыһыаҥҥын, кыһамньыгын олус сыаналыыбыт. Үлэҕэр өссө да үрдүк ситиһиилэри баҕарабыт!
Биһиги эйигин олус ытыктыыбыт уонна таптыыбыт!
Ньурбатааҕы техническэй лицей 8 “А” кылааһын үөрэнээччилэрэ уонна төрөппүттэрэ.
Убаастыыр учууталбыт Анисия Михайловна!
Эйигин Учуутал күнүнэн итиитик-истиҥник эҕэрдэлиибит!
Эн биһигини оскуолаҕа сиэтэн киллэрбит, саҥа дойдуну арыйбыт күндү киһи буолаҕын!
Өссө даҕаны элбэх үчүгэй күннэри, дьолу уонна доруобуйаны баҕарабыт!
Антоновка орто оскуолатын 3 “В” кылааһын үөрэнээччилэрэ.
Тапталлаах учууталбыт Анна Алексеевна!
Эйигин Учуутал күнүнэн ис сүрэхпититтэн истиҥник эҕэрдэлиибит, баҕа санаа бастыҥын, махтал мааны тылларын аныыбыт.
Эн биһигини түөрт сыл араас олимпиадаларга, күрэхтэргэ кытыннаран, билии киэҥ аартыгын арыйбытыҥ, кэрэ эйгэтигэр сирдээбитиҥ. Эн кыһамньыгынан, хас биирдиибитигэр ураты сыһыаҥҥынан үгүс ситиһиилэммиппит, кыайыы кынаттаммыппыт.
Күндү учууталбытыгар бары үтүөнү, кэрэни, куруук билиҥҥиҥ курдук үлэ үөһүгэр үөрэ-көтө сылдьаргар баҕарабыт. Үөрэнээччилэриҥ, төрөппүттэриҥ махталларынан кынаттанан, өссө үрдүк ситиһиилэри дабай!
Саха политехническай лицей алын сүһүөҕүн 2022 сылга бүтэрбит выпускниктарыҥ уонна төрөппүттэриҥ.
Учуутал диэн улуу киһи!
Чугдаарар чуораан доҕордоох,
Умсулҕаннаах уруоктаах,
Улуу дьону иитэн таһаарар,
Талбыт курдук талааннаах,
Айылҕаттан айдарыылаах,
Лоп бааччы саҥалаах,
Барыны-бары билэр,
Аһыныгас сүрэхтээх,
Арассыыйабыт кэскилэ!
Андрей Ляшеев, Дьокуускай куорат 12-с дээх оскуолатын 10 "Б" кылааһын үөрэнээччитэ.
Ытыктабыллаах учууталбыт Мария Егоровна!
Эйигин Учуутал күнүнэн итиитик-истиҥник ис сүрэхпититтэн эҕэрдэлиибит! Биһиги оҕолорбутун үөрэх аартыгар аан бастаан сиэтэн киллэрэн, ийэлии кыһамньыгынан билиигэ, кэрэҕэ уһуйа сылдьаргар үөрэн-көтөн, долгуйан туран махтанабыт, үлэҕин сыаналыыбыт!
Оҕо аймах ыччакка кэскиллээҕи түстүү, үөрэҕи-билиини иҥэрэ, сырдыгынан сыдьаайа сырыт! Айыыһытыҥ арыаллаатын, Иэйэхситиҥ эҥээрдэстин! Тускуо!
Дьокуускай куорат 1 №-дээх оскуолатын 4 «Б» кылааһын кэлэктиибэ уонна төрөппүттэрэ.
Сонуннар
Ордук ааҕаллар
