Учуокка турар оҕо ахсаана аҕыйаабыт
Отпуорунньукка куорат баһылыга Сардана Авксентьева Наркотигы утары хамыыһыйа мунньаҕын ыытта.
Өрөспүүбүлүкэтээҕи наркологическай диспансер иһитиннэрбитинэн, кэнники 11 ыйга 19 улахан киһи учуокка турбут. Бүгүҥҥү күҥҥэ уопсайа 402 киһи баара бэлиэтэнэр. Арыгылааһын, наркомания, токсикомания содулунан 17 обургу оҕо диспансернай учуокка турар. Ону таһынан 118 обургу оҕо уонна 43 оҕо специалистар кэтэбиллэригэр сылдьаллар. Үксэ арыгыны иһии содула.
Үөрэх управлениетын начаалынньыга Алексей Семенов куорат оскуолаларыгар чөл олоҕу көҕүлүүр 50 пост үлэлиирин, волонтердар хамсааһыннара баар буолбутун, оҕолорго сэрэтэр үлэ барарын, үөрэнээччилэргэ дистанционнай тэрээһиннэр, учууталларга семинардар ыытыллалларын кэпсээтэ. Ону таһынан сыл иккис аҥаарын түмүгүнэн учуокка турар оҕо аҕыйаабытын бэлиэтээтэ. Куорат баһылыга дистанционнай үөрэх кэмигэр учуокка турар оҕо ахсаана аҕыйаабыта баар балаһыанньаны толору көрдөрбөт буолуон сөбүн эттэ.
Мунньах түмүгэр Сардана Авксентьева оҕолорго ыытыллар сэрэтэр үлэ көдьүүстээх буоларыгар этиилэри киллэриҥ диэн соруйда.
Сонуннар
Ордук ааҕаллар
