Убаастабыллаах куорат олохтоохторо! Күндү доҕоттор!

Бүгүн, балаҕан ыйын 12 күнүгэр тапталлаах куораппыт төрөөбүт Күнүн бэлиэтиибит. Дьокуускай бырааһынньыгы үчүгэй настарыанньалаах уонна куһаҕана суох түмүктэрдээх көрсөр!
Уопсайа 49 км тахса, былырыыҥыттан икки төгүл уһуннаах, куорат уулуссаларын өрөмүөнэ бүтэһик түһүмэххэ киирдэ. Балаҕан ыйа бүтүөр диэри 15 тиэргэн территориятын тупсаран оҥоруута түмүктэниэҕэ, уокуруктар уонна куорат таһынааҕы нэһилиэнньэлээх пууннар 15 балаһааккаларыгар  воркаут-тренажердар турдулар. 
Бигэргэтиллибит былаан быһыытынан, гражданнары хаарбах туруктаах дьиэттэн көһөрүү бырагыраамата олоххо киирэр, оскуолалар уонна оҕо уһуйааннара, Кыайыы Паарката тутуллаллар, Ленин проспегын капитальнай өрөмүөнэ саҕаланна, уулуссалары сырдатыы үлэтэ тэтимнээхтик барар, куорат таһынааҕы нэһилиэнньэлээх пууннарга түргэн интэриниэт холбонор. 
Ити барыта бырабыыталыстыба уонна өрөспүүбүлүкэ баһылыга Айсен Николаев өйөбүллэринэн, Дьокуускайга сүрүн суолталаах национальнай  бырайыактары олоххо киллэрии быһыытынан оҥоһулунна. Саамай кэрэхсэбиллээҕэ, куорат олохтоохторун өйөбүлүнэн: Дьокуускай олохтоохторо уонна былаас сомоҕолоһон, 2032 сылга буолуохтаах куораппыт 400 сыллаах  үбүлүөйүн көрсө, сайдыытын стратегическай хайысхалара олоххо киирэллэр. 
Аҕыйах хонуктааҕыта Ил Дархан Айсен Николаев «СӨ киин куората – Дьокуускай куорат 2032 сылга диэри сайдыытын туһунан» Ыйаахха илии баттаата. Онно чугастааҕы уон сыл иһигэр бырабыыталыстыбаны, куорат олохтоохторун кытта ыытыахтаах үлэбит хайысхалара чуолкайдык сурулла сылдьаллар. 
Биһиги иннибитигэр турар соруктартан киһи сүргэтэ көтөҕүллэр! 400 сылын көрсө ирбэт тоҥҥо турар төрөөбүт куораппыт бастыҥ, саамай табыгастаах, куттала суох буолуохтаах! Итини булгуччу ситиһиэхпит!
Бу күн килбиэннээх үлэлэрин иһин уонна куораппытыгар уонна аттынааҕы нэһилиэнньэлээх пууннарга суоһаабыт ойуур баһаардарын умуруорууга көмөлөспүт куорат олохтоохторугар ураты махталбын тиэрдиэхпин баҕарабын. Дьокуускай тыһыынчанан олохтоохторо, сүүһүнэн тэрилтэлэрэ, предпринимателлэрэ баһаары кытта охсуһууга сүдү кылааттарын киллэрдилэр. Бииргэ сомоҕолоһон ханнык баҕарар ыарахаттары кыайарбытын, туруоруммут үрдүк сыалларбытын ситиһэрбитин дакаастаатыбыт!
Убаастабыллаах куорат олохтоохторо! Киин куорат салалтатын уонна тус бэйэм ааппыттан ис сүрэхпиттэн куорат Күнүнэн эҕэрдэлиибин, Дьокуускайбыт чэчирии сайдарыгар, хас биирдии ыалга байылыат олоҕу, үтүө санааны уонна этэҥҥэ буолууну баҕарабын!
Бырааһынньыгынан, күндү доҕоттор! Дьокуускай, төрөөбүт күҥҥүнэн!

Дьокуускай куорат баһылыга
Евгений Григорьев