Уһуйааннары үбүлээһин бииргэ үлэлээһини ирдиир

Дьокуускай куораттааҕы Дуума IV-с ыҥырыылаах дьокутааттара СӨ «Ил Түмэн» Судаарыстыбаннай мунньаҕын дьокутааттарын кытта ыкса үлэлииллэр. Хас да сыл устата Дуума Феодосия Васильевна Габышева салайааччылаах наукаҕа, үөрэҕириигэ, култуураҕа, сонуннары киэҥник тарҕатар сириэстибэлэргэ уонна уопсастыбаннай тэриллиилэр дьыалаларыгар кэмитиэти кытта үлэлэһэр.  Бу туһунан Дуума пресс-сулууспата иһитиннэрдэ. 
2021 сыл сэтинньи 26 күнүгэр Дьокуускай куораттааҕы Дуумаҕа бэрэссэдээтэли бастакы солбуйааччы Евсикова Е.И. уонна «Ил Түмэн» Судаарыстыбаннай мунньах кэмитиэтин бэрэссэдээтэлэ Габышева Ф.В. «Оскуола иннинээҕи үөрэхтээһин кыһалҕалаах боппуруостара» (СӨ Бырабыыталыстыбатын 2021 сыл от ыйын 8 күнүнээҕи 237 №-дээх Уурааҕын олоххо киллэрии) тиэмэнэн оробуочай мунньаҕы ыыттылар. 
Ити тиэмэнэн куораттааҕы уокурук оскуола иннинээҕи үөрэҕирии тэрилтэлэрин сэбиэдиссэйдэрин Сэбиэтин бэрэссэдээтэлэ Мария Прокопьева уонна олохтоох дьаһалта үөрэҕириигэ Управлениетын начаалынньыгын солбуйааччы Евгения Королькова тыл эттилэр. Мунньахха «Ил Түмэн» Судаарыстыбаннай мунньах дьокутаата Силкина М.С., куораттааҕы уокурук баһылыгын солбуйааччы Степанова Н.Р., үөрэҕирии Управлениетын оскуола иннинээҕи үөрэҕириигэ салаатын үлэһиттэрэ, Дьокуускай уһуйааннарын сэбиэдиссэйдэрэ кытыннылар. 
 Мунньаҕы социальнай политикаҕа Хамыыһыйа бэрэссэдээтэлэ Васильев Айаан Ильич, Дьокуускай куораттааҕы Дуумаҕа оскуола иннинээҕи үөрэҕирии тэрилтэлэрин сэбиэдиссэйдэрэ үлэни кытта сибээстээх кэккэ боппуруостары быһаарарга көрдөһүүлэригэр олоҕуран, көҕүлээбит. Ол курдук, уһуйааннарга медицинскэй үлэҕэ уонна 2021 сылга үбүлээһин нормативтарын уларыйыытыгар сыһыаннаах боппуруостар киирбиттэр. Итини сэргэ дьокутааттар иннилэригэр үлэһиттэр хамнастарыгар сабыдыаллыыр боппуруостары быһаарыы турар. 
Бүгүҥҥү күҥҥэ оскуола иннинээҕи үөрэҕирии тэрилтэлэрин үлэһиттэрин хамнаһа уопсай үөрэхтээһин тэрилтэлэрин педагогическай каадырдарын хамнаһыттан хаалан иһэрэ, бөлөхтөргө төһө оҕо баарын учуоттаабат үбүлээһин билиҥҥи нормативын кытта үлэһиттэр сөбүлэспэттэрэ  бэлиэтэммит. Бастакы уочарат 40 оҕоҕо тиийэр бөлөхтөрдөөх үлэһиттэр хамнастарын үрдэтии боппуруоһа быһаарыллыахтааҕа, элбэх нэһилиэнньэлээх киин куоракка  оскуола иннинээҕи үөрэҕирии тэрилтэлэрин үлэһиттэрин хамнаһын үбүлээһиҥҥэ ураты сыһыан ирдэнэрэ этилиннэ. 
Боппуруос быһаарылларыгар СӨ «Ил Түмэн» Судаарыстыбаннай мунньаҕын кэмитиэтэ, СӨ үөрэҕириигэ уонна наукаҕа Министиэристибэтэ, олохтоох дьаһалта үөрэҕириигэ Управлениета,  киин куорат оскуола иннинээҕи үөрэҕирии тэрилтэлэрин сэбиэдиссэйдэрэ бииргэ үлэлииллэрэ ирдэнэр. Билиҥҥи турук туһунан анаалыс кэнниттэн СӨ «Ил Түмэн» Судаарыстыбаннай мунньаҕар уонна СӨ үөрэҕириигэ уонна наукаҕа Министиэристибэтигэр боппуруоһу быһаарарга туһуламмыт чопчу этиилэр ыытыллыахтаахтар.