Уһуйааннарга дьуһуурунай бөлөхтөр үлэлиэхтэрэ

Дьокуускай куорат уһуйааннарыгар ыам ыйын 4-7 күннэригэр дьуһуурунай бөлөхтөр үлэлиэхтэрэ.  Манна чуолаан медиктэр уонна быраабы араҥаччылыыр уорганнар үлэһиттэрин оҕолоро сылдьыахтара.
Үөрэх управлениета иһитиннэрбитинэн, РФ үөрэҕириитин министиэристибэтин 2021 сыл муус устар 28 күнүнээҕи АК-280/03 суругар олоҕуран, өрөбүл күннэринэн сибээстээн, ыам ыйын 4-7 күннэригэр «Дьуһуурунай муниципальнай оҕо тэрилтэтин үлэтин тэрийии» диэн бирикээс тахсыбыт.
Мониторинг көрдөрбүтүнэн, сайабылыанньа үксэ медиктэртэн, быраабы араҥаччылыыр уорганнар үлэһиттэриттэн уонна куорат хаһаайыстыбатын тыын суолталаах кыһалҕаларынан дьарыктанар дьонтон киирбит. Онон сиэттэрэн оҕолор испииһэктэрэ оҥоһуллубут. 
Дьуһуурунай бөлөхтөр Дьокуускай куорат 11 №-дээх «Подснежник” оҕо уһуйааныгар арыллыахтара.