Уһун өрөбүллэри уһатыахтарын сөп

Алтынньы 30 күнүттэн сэтинньи 7 күнүгэр диэри СӨ Ил Дархана Айсен Николаев илии баттаабыт Ыйааҕар олоҕуран биллэриллибит уһун өрөбүллэр кэмнэригэр коронавирус дьаҥа тарҕаныытын кэтээн көрөн суһал штаб салгыы быһаарыныыны ылынар. Бу туһунан Саха сирин вице-премьера уонна суһал штаб салайааччытын солбуйааччыта Ольга Балабкина иһитиннэрдэ. 
«Сонуннарга Новосибирскай уобаласка сэтинньи 8-с күнүн кэнниттэн өссө салгыы үлэлээбэт күннэри уһатарга диэн быһаарыныы ылыннылар. Биһиги ыарыы туһунан нэдиэлэтээҕи субуокката суох итинник дьаһалы ылынарбыт эрдэ», – диэтэ вице-премьер.
Дьокуускай куорат Медицинскэй Киинин кылаабынай бырааһа Римма Яковлева хааччахтааһын өссө да уһуур чинчилээҕин бэлиэтээтэ. Кини иһитиннэрбитинэн, быһыы ылбыт гражданнар ахсааннара былааҥҥа тиийбэтэҕинэ үлэлээбэт күннэр уһуохтарын сөп.
«Быһыыны нэһилиэнньэ 70%-на ылара булгуччулаахтык ирдэнэр. Ити таһымы ситистэхпитинэ эрэ хааччахтааһын уһуллуоҕа. Билиҥҥи туругунан өрөспүүбүлүкэ үрдүнэн былаан 55% ситиһилиннэ, оттон киин куоракка – 62%. Уһун өрөбүллэри уһатар туһунан быһаарыныыны нэдиэлэ бүтэһигэр, быһыыны төһө элбэх киһи ылбытынан көрөн таһаарыахтара», – диэтэ Римма Яковлева.