Уһун өрөбүллэргэ суоппардары бэрэбиэркэлиэхтэрэ

Өрөспүүбүлүкэтээҕи ГИБДД саҥа дьыллааҕы уһун өрөбүллэргэ тырааныспардаах суоппардары күргүөмнээхтик бэрэбиэркэлиэҕэ. Бу туһунан регионнааҕы ГИБДД Управлениетын пресс-сулууспата иһитиннэрдэ. 
Эриэйдэлэри суолга куттал суох буолуутун хааччыйар уонна тырааныспар саахалланыытын сэрэтэр сыаллаах ыыталлар. 
«Ахсынньы 24-26 күннэригэр регионнааҕы ГИБДД сотрудниктара 1228 административнай быраабы кэһии боротокуолун толорбуттар,  14 итирик туруктаах суоппары туппуттар, итинтэн икки киһитэ хаһыс да төгүлүн итирик уруулга олорбуттар», — диэн этиллэр иһитиннэриигэ.
Суоппар дастабырыанньата суох 41 киһи тутуллубут.
Ааспыт өрөбүллэргэ Саха сиригэр суолга тырааныспар саахалланыытын икки түбэлтэтэ тахсыбыт. Биирэ Хаҥалас оройуонугар буолбут, биир киһи өлбүт. Итини таһынан Дьокуускайга сатыы сылдьар киһини түҥнэри көтөн эчэппиттэр.