Уһун өрөбүллэргэ суһал штаб рейдэлэрин күүһүрдэр

Ил Дархан Айсен Николаев Ыйааҕынан, Арассыыйа бэрэсидьиэнэ Владимир Путин  «Об установлении на территории Российской Федерации нерабочих дней в октябре - ноябре 2021 г.» Ыйааҕар олоҕуран, алтынньы 30 күнүттэн сэтинньи 7 күнүгэр диэри үлэлээбэт күннэринэн биллэрилиннилэр. Итинэн сибээстээн, Суһал штаб холбоһуктаах бөлөҕө коронавирус дьаҥын тарҕаппат сыаллаах уопсастыбаннай аһылыгы тэрийэр, култуурунай-сынньалаҥ эбийиэктэргэ, уопсастыбаннай тырааныспарга бэрэбиэркэлиир рейдэлэри күүһүрдүөхтэрэ. 
«Урут рейдэҕэ биир бөлөх тахсар эбит буоллаҕына, уһун өрөбүллэргэ бөлөхтөр ахсааннара 4-кэ тиийиэҕэ. Бэрэбиэркэлиир тэрээһиннэр төгүрүк суукканан ыытыллыахтара. Уопсастыбаннай аһылыгы тэрийэр, атыы-эргиэн, өҥөнү оҥорор эбийиэктэри бэрэбиэркэлиэхпит», – диэтэ Административнай  хамыыһыйа бэрэссэдээтэлэ Феликс Антонов. Кини эппитинэн, түүҥҥү саататар тэрилтэлэри бэрэбиэкэлиир рейдэлэргэ ИДьМ сотрудниктара кыттыахтара. 
Хааччахтааһыны кэһии түбэлтэлэригэр РФ КоАП 20.6.1 ыст. боротокуол оҥоһуллан суукка ыытыллар. Сууд 30 тыһ. солк. 300 тыһ. солк. диэри ыстарааптыан сөп. Хос кэһии түбэлтэтигэр ыстараап 500 тыһ. солк. 1 мөл. солк. диэри тиийэр. 
Санатар буоллахха, Атыы-эргиэн кииннэригэр аптекалар, ас-үөл маҕаһыыннара, саамай наадалаах табаары атыылыыр туочукалар (ассортименнарыттан оннук табаар 20% кырата суоҕу ылар буолуохтаах), рестораннар уонна кафелар, гостиницалар уонна хостеллар эрэ үлэлиэхтэрэ, кинилэргэ QR-кодунан эрэ киириллэр. Итинтэн атын эргиэн кииннэрэ, бородууктаны атыылаабат супермаркеттар уонна да атын маҕаһыыннар сабыллаллар. Табаары тиэрдэр сулууспалар уонна өҥөнү дистанционнайдык оҥорор тэрилтэлэр бу хааччахха киирбэттэр. Итини сэргэ социальнай дистанцияны тутуһуу баар буолуохтаах, сааланы аҥаарынан эрэ толоруллуохтаах.