Уһук Илин регионнарыгар сөмөлүөтүнэн көтүүгэ 1,5 миллиард солкуобай көрүлүннэ

РФ премьер-миниистирэ Михаил Мишустин 2021 сылга Уһук Илин федеральнай уокуругун регионнарын икки ардыларыгар сөмөлүөтүнэн көтүүгэ  1,5 миллиард солкуобай суумалаах субсидияны көрөр туһунан дьаһалга илии баттаата. 
Ити дьаһалынан билиэт сыаната 20 хайысханан чэпчэтиилээх буолуо диэн бырабыыталыстыба пресс-сулууспата иһитиннэрэр.
Чэпчэтиилээх хайысхаларга Хабаровскай – Анадырь, Петропавловск-Камчатскай – Южно-Сахалинск, Владивосток – Чита уо.д.а. киирсэллэр. Хайысхатыттан көрөн билиэт сыаната  2,2 тыһыынчаттан саҕалаан 10,9 тыһыынча солкуобайга тиийэр буолуоҕа диэн этиллэр  пресс-сулууспа иһитиннэриитигэр. 
Инники бырабыыталыстыба мунньаҕар Михаил Мишустин чэпчэтиилээх тарыыбынан 100 тыһыынчаттан тахса киһи туһаныаҕа диэн этэн турар. Чэпчэтиилээх билиэттэрдээх барыта 1780-тан итэҕэһэ суох эриэйсэ оҥоһуллуоҕа. 
Мишустин эппитинэн, саамай уһуннук көтүү – Хабаровскай уонна Дьокуускай икки ардыгар 10,7 тыһыынча кэриҥэ солкуобайдаах буолуоҕа. 
20 хайысханан чэпчэтиилээх бастакы көтүүлэри от ыйыттан уһук илиҥҥи «Аврора» авиахампаанньа саҕалыаҕа.