Уһук Илин боксаҕа чемпионата

Дьокуускайга “Кыайыы 50 сыла” Спорт дыбарыаһыгар Саха АССР төрүттэммитэ 100 сылыгар аналлаах маастар нуормалаах Уһук Илин боксаҕа чемпионата бэс ыйын 13-17 күннэригэр ыытыллан, түмүктэнэн эрэр.

Хабаровскай, Приморье, Сахалин, Магадан, Бурятия, Забайкалье, Саха сирин 69 боксера балаҕан ыйын 15-25 күннэригэр Читаҕа буолар Арассыыйа чемпионатыгар кыттар путевканы былдьаһаллар. Арассыыйа чемпионатыгар ыйааһын аайыттан биирдии боксер Уһук Илин сүүмэрдэммит хамаандатыгар киллэриллэллэр. Бастакы миэстэни ылбыттарга спорт маастарын нуормалара иҥэриллэр.

Чемпионат үөрүүлээх аһыллыытын түгэнигэр Саха Өрөспүүбүлүкэтин физическэй култуураҕа уонна спорка миниистирэ Леонид Спиридонов, Арассыыйа боксаҕа сүүмэрдэммит хамаандатын сүрүн тренерэ Виктор Фархутдинов, Саха Өрөспүүбүлүкэтин боксаҕа федерациятын бэрэссэдээтэлэ Петр Алексеев, Арассыыйа боксатын техническэй дэлэгээтэ, норуоттар икки ардыларынааҕы категориялаах судьуйа Сергей Бердник эҕэрдэлээтилэр. Олимпийскай оонньуулар боруонса медалиһа, Саха Өрөспүүбүлүкэтин Ил Дарханын сүбэһитэ Георгий Балакшин кыттыыта чемпионат таһымын үрдэттэ.

Виктор Фархутдинов бэлиэтииринэн, Саха сиригэр бокс тэтимнээхтик сайдар, тренердэр таһаарыылаахтык үлэлииллэр, Арассыыйа сүүмэрдэммит хамаандатыгар түөрт боксер, олор истэригэр Василий Егоров, Евгений Мартынов бааллар. Виктор Борисович бу чемпионакка чугас доҕоро, Арассыыйа уонна Саха Өрөспүүбүлүкэтин үтүөлээх тренерэ Артур Иннокентьевич Пахомовы кэриэстээн кэлбит, кини дойдутугар Ньурбаҕа тиийэ сылдьыбыт. Артур Пахомовка өйдөбүнньүк мемориальнай бэлиэни туруорууга кыттыспыт. Аатырбыт тренер аатын чиэстээн, биир мүнүүтэ чуумпуран турарга көрдөстө. 

АИБА аан дойдутааҕы категориялаах судьуйата, бокса чемпионатын техническэй дэлэгээтэ Сергей Бердник Саха сиригэр кэлбититтэн үөрэрин, олохтоохтор боксаны өйдүүллэриттэн астынарын биллэрдэ. Чемпионат кыттыылаахтарыгар туһаайан, бу чемпионакка хас биирдии боксер кыттыыта улахан үлэнэн ситиһиллибитин, онон дьарыктар кэмнэригэр туохха үөрэммиттэрин рингэҕэ итэҕэтиилээхтик көрдөрөргө кыһаллыахтаахтарын, биир эрэ кыайыылаах баар буоларын, бастыыр туһугар туох-баар дьулуурдарын, тулуурдарын ууран киирсиэхтээхтэрин санатта.

Биһиги өрөспүүбүлүкэбититтэн аан дойду үрүҥ көмүс призера, Европа икки төгүллээх, Арассыыйа үс төгүллээх чөмпүйүөнэ, Арассыыйа спордун үтүөлээх маастара Василий Егоров (51 кг) кыттара улахан интэриэһи үөскэтэр. Ону таһынан, биллэр боксердарбыт –   Арассыыйа ыччаттарын кыайыылааҕа Айтал Дьяконов (63,5 кг), Уһук Илин чөмпүйүөннэрэ Михаил Варламов, Григорий Николаев, эдэр кэскиллээх боксердар Ян Алексеев, Айаал Степанов уо.д.а. 30-ча уол кыттыыны ылаллар. Үрдүкү ыйааһыннарга өрөспүүбүлүкэ чөмпүйүөннэрэ Игорь Никифоров 75 кг, Илья Попов 90 кг киирсиэхтэрэ. Барыта 13 ыйааһын баарыттан биһиэннэрэ 11-гэр кытталлар. Инники күөҥҥэ сылдьар 40 боксербут эрчиллэр-бэлэмнэнэр түмсүүнү ааста. Бэлэмнэрэ үчүгэй. Кисловодскай, Сочи курдук дойду киин куораттарынан сылдьыталаан, кичэллээх бэлэмнэниини аастылар, миэстэҕэ суоттанар ыйааһыннарбытыгар үчүгэй бэлэмнээх боксердар Бурятияттан кэллилэр диэн Саха Өрөспүүбүлүкэтин сүрүн тренерэ Владимир Павлов иһитиннэрдэ.

Чемпионат сүрүн судьуйатынан Баярто Раднаев үлэлээтэ.

63,5 кг Айтал Дьяконов, 54 кг Сирожидин Абдулкадиров, 57 кг Михаил Варламов, Кирилл Эверстов, Ян Алексеев, 60 кг Михаил Парников, Валентин Иванов кыайыыларынан саҕалаатылар. 11 боксер туораата.

Чэппиэргэ, бээтинсэҕэ полуфинальнай киирсиилэр, субуотаҕа – финаллар!