Уһук Илиҥҥи уокурукка чемпионнаатылар

Тохсунньу 19-23 күннэригэр Уссурийскай куоракка остуол тенниһигэр биирдиилээн уонна хамаанданан Уһук Илин федеральнай уокуругун чемпионата ыытылынна. Манна Хабаровскай, Приморскай уонна Забайкальскай кыраайдарын, Магадан, Сахалин, Саха сирин уонна Бурятия хамаандалара күөн көрүстүлэр. Бу туһунан sportyakutia.ru иһитиннэрдэ.
Саха Өрөспүүбүлүкэтин хамаандата ситиһиилээхтик кыттан хас даҕаны категорияҕа бириистээх миэстэҕэ тигистэ.
Ол курдук, дьахталлар икки ардыларыгар биирдиилээн күрэххэ Ольга Тихонова үчүгэй көрдөрүүлэннэ, боруонса мэтээли ылла. Кини – өрөспүүбүлүкэ чемпиона, Арассыыйа спордун маастарыгар хандьыдаат. 
Эр дьоҥҥо Василий Румянцев уонна Ньургун Сабарайкин пааранан разряд көрүҥэр үрүҥ көмүскэ тигистилэр. Кинилэр Михаил Ивановка уонна Михаил Бутылевка эрэ хоттордулар. Оттон Владислав Тимофеев Архангельскайтан сылдьар Павел Тарутинныын паараҕа үһүс миэстэҕэ тигистилэр.
Саха сирин эр дьонун хамаандатын кыттыылаахтара: Василий Румянцев, Ньургун Сабарайкин, Михаил Кылабысов, Константин Владимиров уонна Богдан Капитонов. 
Дьахтар хамаандатын кыттыылаахтара: Ольга Тихонова, Анита Ноговицына, Айыына Петрова, Арина Федорова уонна Надежда Аммосова.
Түмүккэ хамаанданан күрэххэ, эр дьоҥҥо уонна дьахталларга саха сирин теннисистэрэ үһүс бочуоттаах миэстэҕэ таҕыстылар.
Хамаанданан оонньуу түмүгэ:
Эр дьон:
1 миэстэ – Приморскай кыраай
2 миэстэ – Бурятия Өрөспүүбүлүкэтэ

3 миэстэ – Саха Өрөспүүбүлүкэтэ
3 миэстэ – Сахалин уобалаһа
Дьахталлар:
1 миэстэ – Забайкальскай кыраай
2 миэстэ – Приморскай кыраай
3 миэстэ – Саха Өрөспүүбүлүкэтэ
3 миэстэ – Хабаровскай кыраай