Тыыннаах харыйаны хантан атыылаһыахха сөбүй?

      Саҥа дьыллааҕы харыйаҕытын туруордугут дуо? Тыыннаах харыйаны дьиэҕэ аҕалан симээтэххэ дьиэ иһэ ойуур сытынан дыргыйар, саҥа дьыл алыптаах кэмэ өссө киэркэйбиккэ дылы буолар.

Тыыннаах харыйаны хантан ылыахха сөбүн уонна тоҕо ойууртан кэрдэн ылар бобуулааҕын туһунан Дьокуускайдааҕы лесничество үлэһитэ Иван Николаевич Охлопков кэпсииригэр көрдөстүбүт:

-Харыйа – саҥа дьыл саамай сүрүн символа. Дьиҥнээх харыйа хойуу болбукта уонна сымала сыттаах буолар. Бу сыт салгыны вирустартан ыраастыыр кыахтаах, чэбдигирдэр, салгыҥҥа киһи настырыанньатын көтөҕөр фитонцидтары тарҕатар.

Харыйаны дьиэҕэ туруорарга 7-10 лиитирэ ууга угуллуохтаах. Уутугар аскорбинканы, глюкозаны, аспирины эбии кутуохха сөп – оччоҕо өр күөх турар.

Билигин харыйаны көҥүлэ суох ойууртан кэрдэн ылар дьон бааллар. Ойууртан маһы кэрдэн ылыы судаарыстыбаҕа хоромньуну оҥоруу диэн буолар. 1 көҥүлэ суох кэрдиллибит харыйа иһин 650 солк. сыаналаах хоромньуну толуйууга уонна 3000 солк. административнай ыстараапка тардыллыахха сөп. Юридическэй сирэйдэргэ ыстараап – 50 000 солк. буолар. 5000 солк. тахса суумалаах хоромньу оҥорбут дьон, РФ Холуобунай кодексатын 260 ыст. олоҕуран, холуобунай эппиэтинэскэ тардыллаллар.

Бу күннэргэ Лесничество, Ойууру харыстыыр уонна хонтуруоллуур Департамент, полициялары уонна Дьокуускайдааҕы эконадзору кытта бэрэбиэркэлиир рейдэлэри ыытабыт. Онон сокуону кэһээччилэр харыларыттан харбатыахтарын сөп.

-Оттон көҥүллээх харыйалары хантан ылыахпытын сөбүй?

-Нэһилиэнньэ саҥа дьыллааҕы харыйаны “Якутлесресурс” тэрилтэттэн, К.Алексеев аат. уул. 9/1 дьиэтиттэн, үлэ күнүгэр 9.30 – 16.30 чч. тиийэн атыылаһыан сөп. Харыйа сыаната 600 солкуобайтан саҕалаан 1100 солк. тиийэр,. Сыаната уһунуттан хаачыстыбаттытан тутулуктаах. Бэлиэтээн эттэххэ, Дьокуускайга харыйа барыта Аллараа Бэстээхтэн аҕалыллар.

Маһы кэрдиигэ босхо билиэт биэрии ахсынньы 14 күнүттэн тохтоото. Төлөбүрдээх көҥүлү биэрии (145 солк. – 1 уст.) атыы-эргиэн дуогабарын түһэрсии быһыытынан, федеральнай бүддьүөккэ төлөбүр ыытыынан оҥоһуллар.