Тымныы Оҕонньорго суруккун ыыттыҥ дуо?
Тымныы Оҕонньорго сурук суруйан ыытар үгэс билигин да баар. Бу күннэргэ оҕолоох дьон “Улуу Устюг куоракка илдьиппитин хайдах тиэрдэбит?” диэн толкуйга түспүт буолуохтааххыт.
Саха сиригэр саҥа дьыллааҕы почтаны тиэрдии хайыы үйэ саҕаламмыта. Ол курдук почта салааларыгар Тымныы Оҕонньорго сурук ыытарга анал почта дьааһыктара баар буолбуттар. Илдьиттэргитин ахсынньы 31 күнүгэр диэри ыытыаххытын сөп. Көннөрү дьааһыкка киирбит да суруктары тиийиэхтээх аадырыһыгар тиэрдэллэр.
Тымныы Оҕонньор олорор резиденциятын аадырыһа: 162390, Вологодскай уобалас, Улуу Устюг куорат.
Почта үлэһиттэрэ суругу сөпкө толорон ыытарга, маарканы килиэйдииргэ көмөлөһөллөр. Ону сэргэ, Дьокуускай куорат “Созвездие” библиотекатыгар оҕо аймахха Тымныы Оҕонньорго суруйарга көмөлөһөллөр.
Саха сиригэр саҥа дьыллааҕы почта дьааһыктара бу аадырыстарга бааллар:
677000 Дьокуускай куорат, Дзержинскэй уул., 4;
678200 Бүлүү к., Ленин уул., 47;
678230 Үөһээ Бүлүү бөһ., Герой Васильев уул., 9;
678450 Ньурба к., Христофор Максимов уул., 13.