28.10.2022 | 13:00

Тыква барыанньата

Сайын аайы хаһаайкалар куоталаһа-куоталаһа оҕуруот аһын эгэлгэтин үүннэрэллэр, саҥаттан саҥа көрүҥү эбэн иһэллэр. Биир сөбүлээн үүннэрэр көрүҥнэрэ – тыква. Ол эрэн итинтэн тугу астыахха сөбүн сорохтор мунаахсыйаллар. Бүгүн тыкваттан барыанньа арааһын кытта билсиэххэ, астыахха, амсайыахха.
Тыква барыанньата
Ааптар: Киин Куорат
Бөлөххө киир

Састааба:

1 киилэ тыква;

1 киилэ саахар;

1,5 ыстакаан уу.

 

Аан бастаан сироп буһарабыт. Ууга саахары кутабыт, булкуйабыт, оргутабыт. Сироп ньуоскаттан сап курдук синньигэстик түһэр буоллаҕына – бэлэм.

Онтон тыквабытын хаҕылыыбыт, сиэмэтиттэн ыраастыыбыт. Быһа холоон 1 см кээмэйдээх куһуоктарынан кырбастыыбыт.

Тыквабытын көстүрүүлэҕэ уурабыт уонна үрдүгэр сироппутун кутан, мөлтөх уокка оргутабыт. Барыанньабыт хараҥа янтарь курдук өҥнөннө да, сөп буолар, ол аата буспут.

Барыанньабытын истикилээҥкэлэргэ кутаттыыбыт, хаппахтыыбыт уонна сойбутун кэннэ сөрүүн сиргэ туруорабыт.

Минньигэһи сөбүлүүр дьон састаабын уларытыаххытын, саахарын эбиэххитин сөп. Оччотугар 1 киилэ тыкваҕа 1,5 киилэ саахары, 1 ыстакаан ууну кутаҕыт.

Туһалаах сүбэ: тыква наһаа түргэнник илдьи буһар идэлээх. Оннук буолбатын курдук кырбастаммыт тыкваны 1,5%-наах суода суурадаһыныгар (быһа холоон 1 лиитирэ ууга 1,5 кыра ньуоска суоданы кутабыт) 10-15 мүнүүтэ сытыарыллар.

Лимоннаах уонна апельсиннаах барыанньа

Бу наһаа үчүгэй, цитрус амтаннаах уонна дыргыл сыттаах барыанньа.

Састааба:

1 киилэ тыква;

850 г саахар;

1 улахан лимон;

1 улахан апельсин.

 

Тыквабытын хахтыыбыт, сиэмэтиттэн ыраастыыбыт,  куубуктуу кырбастыыбыт.

Апельсиммытын уонна лимоммутун үчүгэйдик сууйабыт. Лимону өлүүскэлэринэн араарабыт, уҥуохтарын хостуубут, онтон хахтаабакка эрээри (ол иһин чараас хахтаах лимон ордук) кыра гына бысталыыбыт.

Апельсины хаҕыттан ыраастыыбыт, уҥуохтарын хостоон быраҕабыт уонна эмиэ кыра гына бысталыыбыт.

Бэлэмнээбит састааппытын барытын иһиккэ кутан булкуйабыт, үрдүгэр саахарбытын кутабыт уонна быһа холоон 4 чаас кэриҥэ туруорабыт, саахара ууллуохтаах, иҥиэхтээх.

4 чаас ааспытын кэннэ өссө төгүл үчүгэйдик булкуйабыт уонна мөлтөх уокка булкуйа-булкуйа 40 мүнүүтэ буһарабыт. Ити кэм аастаҕына, барыанньабыт хойдуохтаах. Булкуйарбытын умнубаппыт, хоруордубаппыт.

Эрдэттэн стерилизацияламмыт бааҥкаларга кутабыт, хаппахпытын эрийэбит уонна сойбутун кэннэ харайабыт.

Дьаабылыкалаах тыква

Састааба:

0,5 киилэ тыква;

300 г дьаабылыка (50 г элбэх-аҕыйах буолуон сөп);

450 г саахар;

4 г корица;

120 г грецкэй эриэхэ;

600 г уу.

 

Тыкваны уонна дьаабылыкалары сууйабыт, хахтыыбыт, сиэмэлэрин ыраастыыбыт. Барытын сөбүлүүрбүтүнэн кырбастыыбыт.

Эриэхэни ыраастыыбыт уонна хайдах сатанарынан кырбастыыбыт, ол эрэн бөдөҥ гыммаппыт. Онтон хобордооххо арыыта суох  5-7 мүнүүтэ ыһаарылыыбыт.

Көстүрүүлэҕэ уу кутабыт, тыквабытын угабыт уонна мөлтөх уокка буһара туруорабыт.

Уубут оргуйаары гыннаҕына, саахарбытын кутабыт, булкуйабыт.

Оргуйбутун кэннэ дьаабылыкабытын эбэн биэрэбит уонна 30 мүнүүтэ оргутабыт, күүгэнин халбыйабыт.

Ити кэнниттэн эриэхэбитин уонна корицабытын кутабыт. Булкуйа-булкуйа өссө 20 мүнүүтэ бытаан уокка оргутабыт.

Буспут барыанньабытын бааҥкаларга кутабыт, хаппахтыыбыт, сөрүүн сиргэ уурабыт.

Курагалаах тыква барыанньата

Састааба:

1 киилэ тыква;

300 г курага;

0,5 киилэ саахар.

 

Тыквабытын хаҕын хастыыбыт, сиэмэтин ыраастыыбыт, түөркэлиибит.

Курагабытын сууйабыт, соломолуу кырбастыыбыт.

Кураганы уонна тыкваны саахары кытта булкуйабыт. Сүмэһиннэрэ тахсыар диэри итинник сытыарабыт.

   Ити кэнниттэн мөлтөх уокка туруоран булкуйа-булкуйа оргутабыт, сойутабыт. Онтон эмиэ оргутабыт, тыквабыт илдьирийиэр диэри 2-3 төгүл итинник гынабыт.

Бүтэһик оргутуу кэнниттэн бэлэмнээбит истикилээҥкэлэрбитигэр кутабыт уонна хаппахтыыбыт.

Мультиваркаҕа буспут апельсиннаах барыанньа

Састааба:

1 киилэ тыква;

1 киилэ саахар;

200 г апельсин;

4 г лимон кислотата.

 

Тыквабытын хаҕылыыбыт, сиэмэтин ыраастыыбыт, кырбастыыбыт, онтон блендеринэн эбэтэр мясорубканан пюре оҥоробут.

Апельсины сууйабыт, 4 аҥы бысталыыбыт уонна уҥуохтарын хостоон быраҕабыт. Хаҕын кытта блендеринэн эбэтэр мясорубканан илдьиритэбит.

   Тыквабытын уонна апельсиммытын холбуубут, саахар кутан булкуйабыт уонна итинник икки-үс чаас сытыарабыт.

   Дьэ, ол кэнниттэн мультиваркабытыгар угабыт, симэһинигэр “тушение” эрэсиимҥэ холбоон 2  чаас буһарабыт. Паара тахсарын курдук клапаннарын аһар ордук диэн сүбэлииллэр.

Буһа турдаҕына булкуйабыт, сүмэһинэ аҕыйах курдук буоллаҕына, 50 мл ууну эбэн биэрэбит.

Буһан бүтүө 15 мүнүүтэ иннинэ лимон кислотатын кутабыт, булкуйабыт.

Буста даҕаны стерильнэй бааҥкаларга кутабыт, хаппаҕын эрийэбит уонна кыһыҥҥыга хаһаанабыт.

 

Минньигэстик аһааҥ!

Сонуннар

Ордук ааҕаллар

Дрону күрдьэҕинэн суулларбыт саха буойуна
Дьон | 16.05.2024 | 14:00
Дрону күрдьэҕинэн суулларбыт саха буойуна
Нэдиэлэ аайы саҥаттан саҥа киһини билсэр, салгыы кинини кытта сибээһи тутар, суруйсар суруналыыс идэлээх киһи үлэтин биир эмиэ интэриэһинэй өрүтэ. Мин анал байыаннай дьайыыга сылдьар суруйбут, ааҕааччы киэҥ эйгэтигэр таһаарбыт уолаттарбын үгүстэрин билсэбин, ыйыталаһабын, ханна тиийбиттэрин, сылдьалларын сураһабын, хомойуох иһин, сорохторун сүтэрэбин...   Хачыгаардыы сылдьан бэбиэскэ туппутум Анал байыаннай дьайыыга мобилизация...
Ытык сирдэнэр буоллубут!
Куорат олоҕо | 09.05.2024 | 18:00
Ытык сирдэнэр буоллубут!
Кулун тутар 15 – муус устар 30 күннэригэр ыытыллыбыт Бүтүн Арассыыйатааҕы рейтиннээх куоластааһыҥҥа Саха сириттэн хаһааҥҥытааҕар да элбэх – 125 156 киһи кыттыыны ылбытын туһунан Ил Дархан уонна Бырабыыталыстыба пресс-сулууспата иһитиннэрэр.   Ол иһигэр Дьокуускай куораттан былырыыҥҥытааҕар икки төгүл элбэх – 52 271 киһи куоластаабыт (былырыын – 29 679 киһи).  «Куорат...
Саха сириттэн сэриигэ  ат хомуура
Сонуннар | 09.05.2024 | 12:00
Саха сириттэн сэриигэ ат хомуура
1941-1945 сыллардааҕы Аҕа дойду Улуу сэриитигэр дойду үрдүнэн ат хомуура диэн барбыта. Сэриигэ киһини кытта тэҥҥэ биир төһүү тыыннаах күүһүнэн ат буолбута. Кыһыл Аармыйа 1 мөлүйүөн 9 тыһыынча атыттан сэриигэ мөлүйүөнтэн ордугун сүтэрбитэ.   Аты таһар-тиэйэр күүс быһыытынан эрэ буолбакка, кавалерияҕа кытта туһаммыттара. Байыаннай-ветеринарнай сулууспа күүскэ үлэлээбитэ. Маныаха 6507 ветврач уонна...
Татьяна Иванова:  «Дьол уйатын ытыктабыллаах сыһыан эрэ тутар»
Дьон | 16.05.2024 | 16:00
Татьяна Иванова: «Дьол уйатын ытыктабыллаах сыһыан эрэ тутар»
Арассыыйаҕа Дьиэ кэргэн сылынан уонна Дьиэ кэргэн аан дойдутааҕы күнүгэр сөп түбэһиннэрэн, таптал кыымыттан саҕыллан биэс уон биэс сыл бииргэ олоруу дьолун билбит Татьяна, Петр Ивановтар дьиэ кэргэн туһунан сырдатабын.   Киһи төрүүрүгэр олоҕо барыта үөһэттэн суруллан кэлэр ыйаахтаах, ол  сиэринэн оҕо, ыччат буола үүнэн, сирдээҕи тапталы көрсөн, ийэ, аҕа дьолун...