Тыа хаһаайыстыбатын үлэһиттэрин үрдүк көрдөрүүлэрин уонна баһаарга көмөлөрүн иһин наҕараадалаатылар

Куорат баһылыга Евгений Григорьев Дьокуускай агропромышленнай комплекс Координационнай сүбэтин мунньаҕар Горнай, Нам улуустарыгар ойуур баһаардарын утары охсуһааччыларыгар көмөнү оҥорбут кэлэктиибинэй, фермерскэй хаһаайыстыбалар үлэһиттэригэр наҕараадалары туттартаата. 
Евгений Григорьев бэлиэтээбитинэн, бааһынай-фермерскэй хаһаайыстыбалар, төһө да курааны, баһаардары кытта сибээстээх ыарахаттары көрүстэллэр, оҥорон таһаарар бородууксуйаларын, сүөһүлэрин, сылгыларын ахсаанын элбэппиттэр. 
«Куорат былааһын өттүттэн үрдүк көрдөрүүлэри ситиспит бааһынай, фермерскэй хаһаайыстыбалары өйүөхпүт. Кинилэргэ докумуон толоруутугар, сир боппуруостарын уо.д.а. быһаарарга көмөлөһүөхпүт. Ыарахан үлэҕит иһин махталбын биллэрэбин», – диэн эттэ куорат баһылыга.
Итини сэргэ кини тыа хаһаайыстыбатын оҥорон таһаарыытыгар диэн сир учаастага ылан баран коттедж, даача тутталларын куорат дьаһалтата хонтуруоллуоҕа уонна бопсуоҕа диэн бэлиэтээтэ. 
Өр сыллаах үтүө суобастаах үлэтин, сылгы иитиитигэр тус кылаатын иһин СӨ тыатын хаһаайыстыбатын Министиэристибэтин Бочуоттаах грамотатынан Хатас сэлиэнньэтин бааһынай хаһаайыстыбатын баһылыга Юрий Петров наҕараадаланна. 
Үтүө суобастаах үлэтин, былааны толорорун иһин Дьокуускай куорат Уокуруктааҕы дьаһалта Бочуоттаах грамотатынан бааһынай хаһаайыстыбатын баһылыга Николай Соловьев  наҕараадаланна. 
Уокуруктааҕы дьаһалта Махтал суруктарынан наҕараадаланнылар: Хатастааҕы сибиинньэ комплексын электригэ Тимур Иванов, бааһынай-фермерскэй хаһаайыстыбалар баһылыктара Наталья Зотова, Екатерина Котрус.
Ойуур баһаардарын умуорууга көмөлөрүн иһин куорат баһылыгын Махтал суруктарын Юрий Петровка, Владимир Скупченкоҕа, Максим Трубиҥҥа, «Баҕарах» ХЭТ салайааччыта Константин Сивцевка, «Саюри» теплица комплексын салайааччыта Сергей Балнайтиска, бааһынай-фермерскэй хаһаайыстыба салайааччытыгар Владимир Кимҥа, Хатастааҕы сибиинньэ комплексын үлэһиттэригэр Георгий Слепцовка, Николай Грязнухиҥҥа, Альберт Ивановка, «Кэнкэмэ» СХПК салайааччыта Афанасий Максимовка туттардылар.
Координационнай сүбэ мунньаҕар тыа хаһаайыстыбатын Управлениетын начаалынньыга Николай Степанов дакылаатын, «Сир сыһыаннаһыыларын Агентствота» МХТ салайааччыта Акулина Друзьянова, предпринимателлэр Владимир Скупченко уонна Оксана Фурсо информацияларын иһиттилэр.