Тыа хаһаайыстыбатын биэрэпиһинэн 90% тахса хаһаайыстыбалар хабылыннылар

Саха сиригэр тыа хаһаайыстыбатын микробиэрэпиһэ түмүктэнэрэ чугаһаата – биэрэписчиктэр 55 317 кэтэх хаһаайыстыбаларга, ол эбэтэр биэрэпиһи ааһыахтаах 90,2% гражданнарга сылдьыбыттар. Ол туһунан СӨ судаарыстыбаннай статистикаҕа федеральнай сулууспатын Территориальнай уорганын пресс-сулууспата иһитиннэрэр. 
Бэлиэтэммитинэн, Таатта улууһугар 99,3%, Ньурба улууһугар 98,9%, Горнай улууһугар 98,1%, Уус-Алдан улууһугар 97,8%, Амма улууһугар  92,5%, Хаҥалас улууһугар 93,8%, Нам улууһугар 90,4%, Сунтаар улууһугар 88,8%, Чурапчы улууһугар 88,4%, Өлүөхүмэ улууһугар 88,1%, Мэҥэ-Хаҥалас улууһугар 86,7% уонна Бүлүү улууһугар 85,2% хаһаайыстыбалары биэрэписчиктэр суруйбуттар. 
Итини сэргэ биэрэписчиктэр 314 кэмиэрсийэтэ суох тэрилтэ бэрэссэдээтэллэриттэн 285-гэр сылдьыбыттар. 
Тыа хаһаайыстыбатын тэрилтэлэрэ, бааһынай фермерскэй хаһаайыстыбалар уонна предпринимателлэр былааҥкалары бэйэлэрэ толороллор уонна анкетаны туттараллар. Билиҥҥи туругунан тыа хаһаайыстыбаларын 99,3% уонна бааһынай фермерскэй хаһаайыстыбаларын 99,2% биэрэпиһи ааспыттар.