Тыа дьонугар туһалаах сыһыарыы

Чурапчылар тыа сирин үлэһиттэригэр саҥа инновационнай бородууктаны оҥорбуттар.

Кылгас кэм иһигэр “Сохрани чек”  диэн саҥа мобильнай сыһыарыыны үлэлэттилэр. Бу Чурапчы улууһун тыатын хаһаайыстыбатын сайыннарар аналлаах.  Агентство дааннайдарын баазатыгар бастакы үп-харчы докумуонун тутар кыахтаах. Судургутук эттэххэ, тыа үлэһит дьонун илдьэ сылдьыахтаах 77 паапкаларын солбуйар.

Чурапчы улууһун дьаһалтатын көмөтүнэн тыа хаһаайыстыбата цифровой сибээс эйгэтигэр ситиһиилээхтик хайыһар.

Бу саҥа сыһыарыы, холобур, Иванов эбэтэр Петров корпоративнай баан каарталаахтар, холобур, күрдьэҕи, атырдьаҕы, тыраахтар саппаас чааһын уо.д.а. малын-салын чиэктэрин тута бу сыһыарыыга киллэрэн иһэр. Бааһынай хаһаайыстыбалаах дьон сотору-сотору чиэктэрин отчуоттууллар, онтуларын барытын тэтэрээккэ килиэйдээн баран эбэтэр паапкаҕа уктан кыбына сылдьар буолааччылар. Аны туран, килиэй быһа сиэн кэбистэҕинэ төһө суумаҕа атыыласпыттара көстүбэт буолан эрэйдэнэллэр, тиһэҕэр отчуот сатаан ситэ туттарыллыбат.

Сыһыарыы өссө да кыаҕа улаатыаҕа дииллэр. Кэлэктиип улуус тыатын хаһаайыстыбатын сайыннарыыга агентствотын кытта бииргэ үлэлээн, инникитин былаанын өссө кэҥэтэр санаалаах.

Чурапчы IT-киинэ хайыы-үйэ култуура уонна социальнай көмүскэл эйгэтигэр сорох тэрилтэлэри кытта партнерскай сөбүлэһиилэрин түмүктээбит. Маны таһынан IT-киин баазатыгар информационнай технологиялар эйгэтигэр үлэлиир исписэлиистэр үлэлиир усулуобуйалара тэриллиэҕэ, ону сэргэ нэһилиэнньэ компьютернай грамотнаһын үрдэтиигэ, үөрэнээччилэр уонна ыччат профориентационнай өйөбүллэрин оҥорууга дьаһаллар былааннаналлар.

Санатан эттэххэ, былырыын ахсынньыга Чурапчы сэлиэнньэтигэр саҥа IT- киин сүрэхтэниитэ буолбута. Бу киин СӨ инновацияҕа, цифровой сайдыыга уонна информационнай технологияҕа министиэристибэтин куонкуруһун кыайыылааҕа буолан, ол үбүнэн тэриллибитэ.