Тыҥырахпытын тупсарабыт

Тыҥырах хас да араҥа кератинтан турар. Араас химическэй сууйар сириэстибэлэри үгүстүк туһанар дьон тыҥырахтара кэбириир, тостор. Уу хаачыстыбата мөлтөҕүн эбэн кэбиһиэххэ. Аны туран, сааһыран истэх аайы тыҥырах туруга эмиэ мөлтүүр. Онон тыҥырахпытын көрүнэ сылдьарбыт тоҕоостоох. Маныаха дьиэ усулуобуйатыгар туһаныллар бастыҥ ньымалары сүбэлиибит.

Оливка арыыта. Тыҥырах кытыытыгар үүнэр тириини сымнатар, тыҥыраҕы кытаатыннарар уонна тупсаҕай оҥорор.

Күҥҥэ иккитэ-үстэ сылаас оливка арыытынан тыҥыраххытын соттон массаастааҥ. Арыы иҥэрин курдук, 15 мүнүүтэ кэриҥэ тутуҥ, онтон суунуҥ.

Эбэтэр маннык ньыма баар. Үс чаайынай ньуоска сылаас оливка арыытын 1 чаайынай ньуоска лимон суогун кытта булкуйуҥ. Онтон баата тампонунан тыҥыраххытын соттуҥ уонна сымнаҕас хлопок бэрчээккини кэтиҥ. Маннык процедураны киэһэ аайы утуйуоххут иннинэ хатылааҥ, сарсыарда туран сылаас уунан суунуҥ. 

Күөх чэй. Кэбирэх уонна саһарар тыҥырахха абыраллаах ньыма бу баар.

Биир чааскы күөх чэйи сойутуҥ уонна онно 10-15 мүнүүтэ тыҥыраххытын уган олоруҥ. Нэдиэлэҕэ иккитэ хатылыахха сөп.   

Эбэтэр бу ньыманы боруобалааҥ. Икки чаайынай ньуоска күөх чэйи, кымаах тууһу уонна саҥа үүнэн испит сэлиэһинэй бурдук туорааҕыттан оҥоһуллубут арыыны (хас да хааппыланы) булкуйуҥ. Итиэннэ 5 мүнүүтэ тыҥыраххытын уган олоруҥ. Нэдиэлэҕэ иккитэ оҥордоххо, сөп буолуо.

Күөх чэйинэн оҥоһуллубут эфирнэй арыыны (хас да хааппыла), кокос арыытын эбэтэр алоэ вера гелин кытта холбоон булкуйабыт. Манан нэдиэлэҕэ биирдэ-иккитэ массаастаныҥ.

Лүөн сиэмэлэрэ. Лүөн арыыта аптекаларга атыыланар. Ону атыылаһан, утуйуоххут иннинэ тыҥыраххытын соттон массаастааҥ. Сымнаҕас бэрчээккитэ кэтиҥ, оччоҕо ордук туһалыаҕа.

Аны туран, лүөн сиэмэтин күннээҕи аскытыгар-үөлгүтүгэр хото киллэриҥ диэн суруйаллар. Холобур, 2 остолобуой ньуоска лүөн сиэмэтин  сарсыардааҥҥы хааһыга табыгынатан сиэххэ эбэтэр коктейлга кутан иһиэххэ сөп. 

Е битэмиин арыыта. Бу сириэстибэ тыҥыраҕы сымнатар уонна туругун тупсарар. 

Тыҥыраххытын Е битэмиин арыытынан соттуҥ уонна үчүгэйдик массаастааҥ.

Өссө туһалаах буоллун диэн Е битэмиини иһиҥ диэн сүбэлииллэр.

Бассаап сүбэтэ

Үгүс ыарыыны «үүрэр» ликер

Бу ырысыабы эдьиийим аймахтар бөлөхтөрүгэр ыыппыта. “Оҥостон боруобалаан көрдүм, санаабар, туһалаан эрэр”, – диэн үөрүүтүн үллэстибитэ. Ону тылбаастаан бэчээттиибит. 
Биһиэхэ курдары көстөр бытыылка наада. Онно 12 өлүүскэ чесногу түөрт гына кырбаан баран угабыт. Үрдүгэр үс ыстакаан кыһыл винону кутабыт. Хаппахтаан баран түннүккэ, күн көрөр сиригэр икки нэдиэлэ туруорабыт. Күн аайы иккитэ-үстэ сахсыйан биэрэбит. Икки нэдиэлэнэн ылан сиидэлиибит уонна хараҥа бытыылкаҕа көһөрөбүт. Бу ликеру күҥҥэ үстэ чаайынай ньуосканан ый устата иһэбит. 
Аптаах сириэстибэ организмҥа мунньуллубут тууһу таһаарар, хааны ыраастыыр, иммунитеты бөҕөргөтөр, сэниэ эбэр. Ону таһынан сүрэх үлэтин тупсарар, бэссэстибэ атастаһыытын тупсарар, токсиннартан ыраастыыр.