Туймаада ыһыаҕын генеральнай спонсора ПСБ

Арассыыйаҕа Дьиэ кэргэн, Саха Өрөспүүбүлүкэтигэр Оҕо саас сылларыгар анаммыт быйылгы Туймаада ыһыаҕын генеральнай  спонсорынан ПСБ буолла.

Бырааһынньыктааҕы тэрээһиннэр чэрчилэринэн ПСБ баан түһүлгэтигэр «Бизнес в объективе. Семейный бизнес» хаартыска быыстапката дьон-сэргэ сэҥээриитинэн туһанна. Быыстапка дьоруойдара – көмүс хостооччулар, бырайыактыыр үлэнэн дьарыктанааччылар, тутуу матырыйаалын оҥорон таһаарааччылар, атыы-тутуу эйгэтин бэрэстэбиитэллэрэ о.д.а. Оттон баай ис хоһоонноох быыстапка партнердарынан Дьокуускай куорат Олохтоох дьаһалтата, Эргиэн-промышленнай палата, «Мой бизнес» киин буоллулар.

Генеральнай спонсор түһүлгэтигэр маны сэргэ дьиэ кэргэнинэн урбааны тэрийиигэ аналлаах дискуссия буолан ааста.

«Туймаада ыһыаҕа – Саха Өрөспүүбүлүкэтин территориятыгар, тас да дойдуларга олохтоох дьону барыларын сомоҕолуур бэлиэ тэрээһин. Бу бырааһынньык хас да көлүөнэ дьону Саха норуота диэн ааттанар биир улахан дьиэ кэргэн тула түмэр. Бу күннэргэ саха норуотун төрүт үгэстэрэ көлүөнэттэн көлүөнэҕэ туттарыллаллар. Биһиги бааммыт социальнай суолталаах бырайыактары куруук өйүүр, онон Саха Өрөспүүбүлүкэтин экономикатын бөҕөргөтүүгэ сүҥкэн кылааттаах дьиэ кэргэннэргэ болҕомто уурдубут», – диэтэ ПСБ баан Саха сиригэр региональнай дириэктэрэ Людмила Клюско. 

«Туймаада ыһыаҕа бэйэтэ спонсордардаах, меценаттардаах. Быйыл бу дьоһун испииһэккэ Арассыыйаҕа биллэр ПСБ баан киирбитэ үөрүүлээх. Онон ПСБ салалтатыгар уонна кэлэктиибигэр саха норуотун төрүт үгэстэригэр болҕомтоҕут иһин махтанабын», – диэн бэлиэтээтэ куорат баһылыга Евгений Григорьев.

Бэлиэтээн эттэххэ, «Бизнес в объективе. Семейный бизнес» ПСБ баан дьоҕус уонна орто урбаан бэрэстэбиитэллэригэр аналлаах бырайыага. Бырайыак 10 сыллаах историятыгар Арассыыйа үрдүнэн 800-чэкэ презентация ыытыллан кэлбит, диэн иһитиннэрэр Олохтоох дьаһалта пресс-сулууспата.