Туймаада Ыһыаҕар бэлэмнэнии саҕаланна

Туймаада Ыһыаҕа быйыл бэс ыйын 26-27 күннэригэр ыытыллыаҕа. Бээтинсэҕэ аһылык солбуйааччыта Роман Сорокин кыттыыллаах Тэрийэр кэмитиэт бастакы мунньаҕа буолан ааста.

Былырыын пандемия сылыгар Ыһыах онлайн ньыманан ыытыллыбыта. Быйылгы Ыһыах бары харыстанар ньымалары туһанан туран ыытыллыахтаах. Ыһыах сүрүн режиссерунан РФ Култууратын үтүөлээх үлэһитэ Афанасий Федоров, туруорааччы режиссерунан Култуура туйгуна Наталья Кралина үлэлиэхтэрэ. Сорох тэрээһиннэр былырыыҥҥы курдук онлайн балаһааккаларага ыытыллыахтара.

Куорат хаһаайыстыбатын эксплуатациялыыр сулууспа салайааччытын солбуйааччы Татьяна Павлюковская кэпсээбитинэн, Ыһыахха “Үс-Хатыҥ” түһүлгэтин бэлэмнииргэ, элбэх киһи тоҕуоруһар тэрээһинин ыытарга, уоту, ууну тардарга, суоллары оҥорорго о.д.а. быһа холуйан 11 мөл. 700 тыһ. солк. туттуллуоҕа.

Куорат баһылыгын экономикаҕа уонна үп-харчы боппуруостарыгар солбуйааччы Георгий Гаврильев этэринэн, Быйылгы Ыһыах уопсай бүддьүөтэ 24 мөл. 360 тыһ. солк. былааннаммыт. 2018 сыллаахха Ыһыахха 48 мөл. солк. 2019 с. – 45 мөлүйүөнтэн тахса туттуллубута.

Ыһыах концепциятын төрүттэспит учуонай-этнограф Екатерина Романова Туймаада, Эҥсиэли, Эркээни хочолорун иччилэригэр сүгүрүйүү сиэрин-туомун улахан экраҥҥа трансляциялыыры туруоруста. Маны таһынан кини, Ыһыах иччилэргэ уонна Үрдүк Айыыларга сүгүрүйүү сиэрин-туомун толорор кэм буоларын быһыытынан, Үс-Хатыҥҥа араас сүүйүүлээх лотереялары ыытары боборго ыҥырда.