Туймаада ыһыаҕа быйыл Дьиэ кэргэн уонна Оҕо саас сылларыгар ананар

Туймаада ыһыаҕа быйыл бэс ыйын 29-30 күннэригэр «Үс Хатыҥ» комплекса 27-с төгүлүн ыытыллар уонна Арассыыйаҕа Дьиэ кэргэн, Саха Өрөспүүбүлүкэтигэр Оҕо саас сылларыгар уонна VIII-с «Азия оҕолоро» Норуоттар икки ардыларынааҕы спортивнай оонньууларга ананар.
Ааспыт нэдиэлэҕэ Олохтоох дьаһалтаҕа куорат баһылыгын солбуйааччы – дьаһалта аппараатын салайааччыта Руслан Тимофеев салайааччылаах Туймаада ыһыаҕын тэрийэр хамыыһыйа уочараттаах мунньаҕа өрөмүөн, былааннанар тэрээһиннэр туһунан кэпсэттэ.
Ол курдук, «Үс Хатыҥ» тутууларын өрөмүөнэ, суолларын оҥоруу, сибээһи тупсарыы, быылы хаптатыы, ыһыах ыалдьыттарыгар куттал суох буолуутун хааччыйыы, санитарнай туочука ахсаанын элбэтии курдук тэрээһин боппуруостара болҕомто киинигэр турдулар.
Сиэр-туом чааһын сүрүн режиссерунан, урукку сылларга курдук, Арассыыйа култууратын үтүөлээх үлэһитэ, СӨ үтүөлээх артыыһа Афанасий Семенович Федоров буолар, консультанынан историческай наука доктора Екатерина Назаровна Романова үлэлиир. 
Ыһыах култуурунай чааһыгар 100-тахса тэрээһин былааннанар, ол иһигэр Дьиэ кэргэн уонна Оҕо саас сылларынан дьиэ кэргэнинэн күрэхтэр буолуохтара.
Бэлиэтээн эттэххэ, Туймаада ыһыаҕар сылдьан саха норуотун баай үгэстэрин, дириҥ култууратын кытта билсиэн баҕалаах ахсаана сыллата элбии турар, аҥаардас ааспыт 2023 сылга 230 тыһыынчаттан тахса киһи ыалдьыттаан ааспыта, диэн Олохтоох дьаһалта пресс-сулууспата иһитиннэрэр.