«Туймаада ыһыаҕа-2024»: быылы суох оҥоруу, суотабай сибээһин тупсарыы

Быйыл 27-с төгүлүн «Үс Хатыҥ» архитектура-этнография комплексыгар ыһыллар Улуу Туймаада Үрүҥ Тунах ыһыаҕар Арассыыйа регионнарыттан уонна 26 тас дойдуттан үтүмэн элбэх ыалдьыт кэлээри олорор. Онон бу күннэргэ бэлэмнэнии үлэтэ оргуйан олорор.
Урукку тутуулары саҥардыыны сэргэ, саҥа эбийиэктэр эмиэ эбиллэллэр, ол иһигэр «99 сэргэ» аллея саҥардыллар, Алгыс түһүлгэтэ кэҥэтиллэр, ипподромҥа саҥа эбийиэктэр тутуллаллар.
Уунан хааччыйыыга, быылы хаптатыыга, суотабай сибээһи тупсарыыга эмиэ элбэх үлэ ыытыллар. Чуолаан «Якутдорстрой» тэрилтэ күүһүнэн Үс Хатыҥҥа тиэрдэр суолларга быылы утары үлэ ыытыллыаҕа, сибээс хаачыстыбатын тупсарарга 7 базовай ыстаансыйаны, эргиэн эрээттэригэр Wi-fi туруорар туһунан кэпсэтиилэр бара тураллар.
Самаан сайын саамай бэлиэ бырааһынньыгар бэлэмнэнии былаан быһыытынан бара турар, диэн иһитиннэрэр Олохтоох дьаһалта пресс-сулууспата.