Тутааччылар махтал суругунан бэлиэтэннилэр

Ильменскэй уулуссаҕа үлэҕэ киирбит элбэх функциялаах спорт комплексын үөрүүлээх арыйыыга тутааччыларга өрөспүүбүлүкэ таһымнаах махтал суруктары туттардылар.

Дьокуускайга Арассыыйа күнүгэр, бэс ыйын 12 күнүгэр, үлэҕэ киирбит элбэх функциялаах спорт комплексын үөрүүлээх арыйыыга СӨ бырабыыталыстыбатын бэрэссэдээтэлэ Кирилл Бычков, СӨ физическэй култуураҕа уонна спорка миниистирэ Леонид Спиридонов уонна куорат баһылыга Евгений Григорьев кыттыыны ыллылар.

Бырабыыталыстыба бэрэссэдээтэлэ Кирилл Бычков спорт комплексын баара-суоҕа 10 ый иһигэр түргэнник тутан үлэҕэ киллэрбит тутааччыларга махталын уонна саҥа комплекс спорду сэҥээрээччилэргэ өр сылларга сулууспалыырыгар эрэнэрин биллэрдэ.

Бу күн тутааччыларга – «Монтажник» ПК кэлэктиибигэр, «Спектр» ХЭТ дириэктэрэ Андрей Борисовка, «Аартык Строй» ХЭТ сыбаарсыга Илья Борохиҥҥа, «Аартык Строй» ХЭТ учаастактааҕы начаалынньыга Егор Захаровка, «Аартык Строй» ХЭТ снабженеһа Евгений Поповка – СӨ тутуу министиэристибэтин махтал суруктарын туттардылар.

Куорат баһылыга Евгений Григорьев аҕыйах хонугунан «Азия оҕолоро» Оонньууларга өрөспүүбүлүкэбит, куораппыт чиэһин көмүскээри турар эдэр спортсменнарга уонна куорат олохтоохторугар туһаайан Дьокуускайга бу тохсус ДЮСШ уонна бастакы уус-уран гимнастика ДЮСШта баар буолбутун бэлиэтээтэ. «Бүгүҥҥү күҥҥэ Дьокуускайга 1000 кэриҥэ кыыс уус-уран гимнастиканан дьарыктанар, кыргыттар мантан ыла бары ирдэбилгэ эппиэттиир бэйэлэрэ туһунан саалалаах буолуохтара. Дойду баһылыга Владимир Путин өйөбүлүн ылбыт Дьокуускай куорат маастар-былаанынан 2030 сылга диэри куорат атын оройуоннарыгар өссө 7 спорт эбийиэги тутуохпут»,– диэн иһитиннэрэр Евгений Григорьев. 

Саҥа спорт комплексын өйдөбүнньүк күлүүһүн дириэктэр Василий Рязанскайга туттардылар.

Уопсайа 2800 кв.м иэннээх, аллараа этээһэ 13 тиийэ үрдүктээх саҥа спорт комплексын маҥнайгы этээһигэр волейболлуур саала, иккискэ бокса, тренажёрдар саалалара, медкабинет, тренердэр хосторо бааллар. Манна VIII-с «Азия оҕолоро» волейболга күрэхтэһиилэрэ буолуоҕа.
«Азия оҕолорун» кэнниттэн саалаҕа тустуу, гимнастика, бокса, пауэрлифтинг, волейбол дьарыктара ыытыллыаҕа. Ону сэргэ сахалыы остуол оонньууларыгар дьарыктаныахха сөп буолуоҕа.
Санатар буоллахха, спорт комплекса «Демография» нацбырайыагынан, СӨ «Саха Өрөспүүбүлүкэтигэр физическэй култуураны уонна спорду сайыннарыы» уонна «2017-2032 сылларга Дьокуускай куорат социальнай инфраструктуратын кэлимник сайыннарыы» муниципальнай бырагырааманан олоххо киирдэ, диэн иһитиннэрэр Олохтоох дьаһалта пресс-сулууспата.