''Тускул'' КК сонуннара

Бииргэ буолуу бигэ, кытта буолуу кытаанах турук буолуу төрдө буолара өбүгэ саҕаттан биллэр суол. Бииргэ үлэлээһин үтүөтүн ''Тускул'' КК үлэтин бары хайысхатыгар олус диэн бэркэ туһанар. Олортон биир хайысха иис-күүс, ойуулуур-дьүһүннүүр эйгэлиин алтыһыылара буолар. Манна биһиги биир дойдулаахпыт Федот Гаврильевич Макаров кэргэнинээн Светлана Михайловналыын кылааттара баарынан киэн туттабыт уонна махталбыт муҥура суох. Ол курдук маҥнайгы  улахан (фундаментальнай) үлэ олоҥхо тематыгар триптих буолар. Бу үлэни ''Утум иис'' иистэнньэҥнэрэ Татьяна Иннокеньевна Олесова,  Анна Ильинична Ефимова, Анна Петровна Пестерева тикпиттэрэ Арассыыйа таһымыгар быыстапкаларга биһирэбили ылбыттара.

Күн бүгүн саха санаалаах барыта Саха Өрөспүүбүлүкэтин эһиилги үбүлүөйүгэр бэлэмнэнэр, тэринэр, бэринэр, сааһыланар, наарданар. ''Утум иис'' онно бэлэмнэнэн Дьокуускай куорат гербэтин кырадаһынан тигиэхтээх. Күн бэҕэһээ, о.э. 06.07.21 ол үлэ саҕаланна. Бу үлэни кырадаһынынан иискэ бэлэмнээн, өҥүн - дьүһүнүн дьүөрэлээн, этэргэ дылы сантымыатырга диэри сааһылаан, миллимиэтиргэ диэри мээрэйдээн Макаровтар уруһуйдаан биэрбиттэрэ. Дьэ бу курдук бииргэ буоларбытыттан бигэ буоларбытыгар кылааттарын иһин Федот Гаврильевичка, Светлана Михайловнаҕа махталбытын тиэрдэбит, сарсын буолар Дьиэ кэргэн күнүнэн эҕэрдэлиибит. Аны да үтүөнү үксэтэргитигэр, кэрэни элбэтэргитигэр төрүөт баар буоллун, этэҥҥэ буолуҥ диэн алгыыбыт.  
Тускул КК иһинэн үлэлиир Норуот оҥорон таһаарар үлэлэрин, норуот айымньыларын дьиэтин салайааччыта Татьяна Григорьевнаҕа Жирковаҕа, ''Утум иис'' түмсүү салайааччыта Пестерева Анна Петровнаҕа ситиһиилэри, кыайыылары баҕарабыт.