06.07.2021 | 14:30

Тускул КК сонуннара

Куйаар нөҥүө Бразилияларга ыалдьыттаатыбыт
Тускул КК сонуннара
Ааптар: Наталья РУФОВА
Бөлөххө киир

Бүгүн, дьиҥ чахчы өҥүрүк куйаас сатыылаан турдаҕына, сырылатан түһэн  сылаас да сылаас, илгийэн түһэн итии да итии күҥҥэ 2021 сыл от ыйын 5 күнүгэр ''Тускул'' КК кэллэктиибэ сарсыарда биэс аҥаар чаастан саҕалаан үс аҥы аадырыска аттанна. Хас биирдии биригээдэ туспа сыаллаах - соруктаах, ол сыал  быһыытынан этэргэ дылы тииһигэр диэри сэбилэниилээх - күүстээх телефоннар, эрдэттэн бэлэмнэниллибит кэпсииргэ аналлаах былаһааккалардаах. Бу ''Дьиэҕэ олорон айан'' бырайыак уочараттаах таһаарыыта. Биллэр биричиинэнэн кэлии - барыы улахан хаарчахха турар, онон бу бырайыак күн бүгүн да тоҕоостоох. Дьиэлэриттэн олорон айаннааччылар бразилецтар. Бүгүҥҥү группаҕа сороҕо былырыыҥҥы дьон бааллар, онон биир да тыл, биир да локация хатыланыа суохтаахтар. Сүрүн сыалбыт сорукпут - ыһыаҕы сырдатыахтаахпыт, ис дьиҥин - суолтатын, бөлөһүөпүйэтин арыйыахтаахпыт. Хаарчах суоҕа буоллар ыһыахтан репортаж оҥороммут ''куобах'' бөҕөтүн өлөрүөхпүт этэ... Инньэ гынан сүбэлэһэн баран ыһыахха бэлэмнэниини киэҥник, дириҥэтэн кэпсээтибит. Бастакы локациябыт олоххо куруутун актыыбынай позициялаах, саха төрүт үгэһин тутан олорор бииргэ буолбуттара отуттан тахса сыл буолбут, этэргэ дылы хайдах хааман киирэриттэн, көрөрүттэн өйдөһөр таһымҥа тиийбит ыллыктаах санаалаах Елена, Федот Николаевтар дьиэ кэргэттэрин тэлгэһэлэрэ уонна дьиэлэрэ.

Манна ыытааччыбытын, кэпсээччибитин Колымана Ларионованы бразилецтарбыт былырыыҥҥыттан наһаа сөбүлүүллэр, быйылгы да көрсүһүүгэ маҥнайгынан кини баарын суоҕун сураҕаласпыттара. Онон билэр киһилэрин көрөн хара маҥнайгыттан истиҥ тыыҥҥа киирдибит.  Ыһыах туох баар аһын - үөлүн туохтан оҥорорбутун – эт аһылыгы, үрүҥ аһы уо.д.а. Бразилецтарбыт олус интэриэһиргээтилэр быырпах ырыссыабын ыытарбытыгар көрдөстүлэр.  Иккис локациябыт үйэлэри туораабыт үтүөкэн үгэстэрбитин, төрүттэрбит мындыр өйдөрүн, сатабылларын, дьоһун, хоһуун майгыларын өйүгэр-санаатыгар илдьэ сылдьар уонна ону салгыы салгыыр, үйэтитэр, сайыннарар, аан дойду таһымыгар таһаарар сыаллаах - соруктаах кимиилээхтик, таһаарылаахтык үлэлии-хамсыы, дьаһайа, салайа сылдьар саха далбара Попова Софья Трофимовна - ''Чороон 21 үйэ'' тэрилтэ салайааччытын кытта буолла.  Үөрдэ - көтүтэ, киэн тутта дьиҥнээх саха балаҕанын тутулун тутуһан биир да тоһоҕото суох тутуллубут балаҕаны көрдөрдүбүт, тиит маспытын хайҕаатыбыт, наара ороннору арыйан көрдөрдүбүт. Дьиэ ис бараанын олус интэриэһиргээтилэр, туос иһити ыйыталастылар, көмүлүөк оһохпутун иҥэн - тоҥон көрдүлэр, иһиттилэр.  Балаҕаммыт үрдүн хатырыгынан, сир кырсынан сабыллыбытын уонна хайа да ардахха, хаарга тэстибэтин хайҕаатылар. Софья Трофимовна холку, дьоһун сэһэнин сэргээтилэр, тэлгэһэни барытын кэрийтэрэн көрдөрбүтүн биһирээтилэр. Сахалыы фарфорунан оҥоһуллубут иһит толору наборун сакаастаан ылыах буоллулар. Аны онно көмүлүөк оһоххо таҕааҥҥа хобордоох ууран алаадьылаатыбыт, ол иннигэр дьиэ хаһаайката, саха далбара күннээҕи алгыһын сиэрин - туомун Евдокия Семёнова көрдөрдө. Онтон куйаар нөҥүө төттөрү Хатаска тиийэн буһууну-хатыыны, уопутурууну бара сылдьар, бэйэтин суолун тэлэ сылдьар эдэр тимир ууһугар Алексей Апросимовка тиийдибит. Онно кинилэргэ саха быһаҕын арааһын кэпсээтэ уонна....тоҥ балыгы астаата, үтэһэлээх эти бэлэмнээтэ. Онтон Тускул КК тэлгэһэтигэр кыбытыылаах иис кистэлэҥнэрин иҥэриммит, төрүт иис-күүс үлэтин этинэн - хаанынан билэр Пестерева Анна Петровна үлэлэрин Вилена Константинова үөрэн - көтөн чаҕылыйан кэпсээтэ. Бразилецтар бэйэлэрин темпераменнарыгар сөп түбэһэр кэпсээнньиппитин быйыл да былырыын да олус диэн бэркэ ылыннылар. Кылынан оҥоһуктарбыт кырасыабайдарын, көстүүлээхтэрин ааһан доруобуйаҕа туһалаахтарын истэн чугаспыт буоллар сибилигин да сакаастыах курдук буоллулар. Кыл оҥоһуктары Алексеева Анастасия Ивановна оҥорбут  чороонуттан уратытын барытын саҥаны,сонуну саҕалыыртан хаһан да саллыбат, саха төрүт ииһин кистэлэҥнэрин умсугуйан туран үөрэтэр, чинчийэр Людмила Степановна Саввина киэннэрэ. Дьоһун үлэлэр, дьикти көстүүлэр. Дьэ тыл күүһэ, итэҕэтии күүһэ итиннэ сыттаҕа. Браво Вилена!


Куоракка өссө биир локациябыт ''Арчы'' дьиэтэ. Онно сахалыы таҥас арааһын кэпсээтибит, көрдөрдүбүт, киэргэл арааһын күн уотугар күлүмүрдэтэ оонньоттубут. Онтон ''Арчы'' дьиэтин салайааччыта Андреева Лариса Константиновна бу сыллар тухары кыайа-хото тутан, чахчы өйүн - санаатын өркөнүн, билиитин - көрүүтүн дириҥин биэрбит, этинэн - хаанынан билбит, биир тылынан эттэххэ бэйэтин нөҥүө аһарбыт дьыалатын ыһыаҕы бириэмэбит ыгымынан сибээстээн Гиннесс рекордарыгар сыһыаран кэпсээтэ. Этэргэ дылы түөс мөтөйөр, харах умайар, сүрэх өрүкүйэр түгэннэрин киэн тутта иһиттибит.
Хомус тыаһын дьүрүлгэнигэр бигэннибит, айылҕа маанылаахтара кыталык кыыллар үҥкүүлэрин ''Күөх сирэммитигэр'' көрдөрдүбүт. Тула өттүбүт күөх солкоҕо сууламмыта, хаарыс солконон  суугунаабыта дьикти кэрэ... Оо, сайын барахсан кырдьыга да туойуллуоххун туойуллаҕын, хоһуллуоххун хоһуллаҕын.


Түмүкпэр Тускул КК үлэтэ норуоттар икки ардыларынааҕы таһымҥа тахсарыгар күүс көмө буолбут Анна Петровна, Павел Петрович Пестеревтарга, Елена Егоровна, Федот Рожьевич Николаевтарга, Софья Трофимовна Поповаҕа, Лариса Констаниновна Андрееваҕа, Алексей Апросимовка, Николай Евсеевич Жирковка, Людмила Степановна Саввинаҕа, Анастасия Ивановна Алексееваҕа, Михаил Спартакович Окороковка, Василий Егорович Пинигиҥҥэ, Татьяна Ивановаҕа, Чэмэлиинэ Семёноваҕа, Люба Окороковаҕа, Виталина Сивцеваҕа, Сахаайа, Саина Павловаларга, Сарыал Ивановка, ''Тускул'' үҥкүү ансаамбылын үҥкүүһүттэригэр отуттан тахса кыраадыс итииттэн илистибэккэ, куйаастан куттаммакка биһигинниин буолбуккутугар барҕа махтал. 


Тэрээһин хааччахтааһын бары ирдэбиллэрин толорон ыытыллыбытын бэлиэтээн этэбит.
Истиҥ, сэргээҥ, кэрэхсээҥ сахабыт норуотун сэргиир Бразилиялары. Бу бырайыак Санкт Петербург куоракка, Москваҕа, Бразилияҕа баар биһиги куруутун бииргэ үлэлэһэр тэрилтэлэрбитин кытта ''төрөппүт'' бырайыакпыт буолар. Биһиги бастаан кинилэр конкурстарыгар кыттааччы быһыытынан тиийэн баран сибээспит ситимин быспакка күн бүгүҥҥүгэ диэри бииргэбит.
Аныгыс көрсүөххэ диэри.

От ыйа, 2021 сыл

Сонуннар

Ордук ааҕаллар

Татьяна Гоголева:  «Төрөөбүт тылын билбэт ыччат ханна да сыаналаммат»
Дьон | 13.06.2024 | 10:00
Татьяна Гоголева: «Төрөөбүт тылын билбэт ыччат ханна да сыаналаммат»
«Хотугу сулус» оҕо телерадиоакадемиятын төрүттээбит, үгүс көлүөнэ талааннаах ыччаты көччөх гынан көтүппүт Татьяна Гоголева, чахчы, Саха сиригэр тыыннаах номох буолбут киһи. СӨ култууратын үтүөлээх үлэһитэ, СӨ култууратын, социальнай эйгэтин туйгуна, «Гражданскай килбиэн» бэлиэ хаһаайына олоҕун тухары оҥорбута, айбыта-туппута, үйэтиппитэ үгүс.   Кини туһунан бу иннинэ сурулунна ини, суруллубата ини. Ол эрээри...
“Сүүрэр суолга – Владимир Слепцов!”
Спорт | 18.06.2024 | 14:15
“Сүүрэр суолга – Владимир Слепцов!”
Спорт көрүҥнэриттэн биир бастыҥнара уһун сиргэ сүүрүү. Ырааҕы сүүрүүнэн ылбычча киһи дьарыктаммат. Бэйэтин кэмин аатырбыт сүүрүгэ-быһыйа, Саха АССР рекордсмена, стайер уонна марафонец Владимир Слепцову ааспыт үйэ 60-80 сылларын дьоно үчүгэйдик өйдүүр-билэр. Быйыл рекорд олохтообута лоп-курдук 50 сыла. Аҕаларын, эһэлэрин кэриэстээннэр оҕолоро, сиэннэрэ, бииргэ төрөөбүт балта  Людмила Пантелеймоновна, быраата Артем Пантелеймонович...
ЭкоБизнес —  Айылҕаҕа харыстабыллаах  сыһыаҥҥа тирэҕирэн
Дьон | 14.06.2024 | 14:00
ЭкоБизнес — Айылҕаҕа харыстабыллаах сыһыаҥҥа тирэҕирэн
Дьокуускайга бизнес араас хайысхата сайдар. Олохтоох бородууксуйаны оҥорон атыыга таһаарыы ордук элбэх эбит буоллаҕына, туризм курдук өҥөнү оҥорор предпринимателлэр тарбахха баттаналлар. Юлиана уонна Захар Алексеевтар элбэх оҕолоох дьиэ кэргэн Дьокуускай таһынааҕы Капитоновка сэлиэнньэтигэр туристическай бизнеһи сайыннаран эрэллэр.   Оҕолор улааттылар диэн саҕалаабыппыт – Биһиги үс уоллаахпыт. Улахаттарбыт 14 саастарын туолбуттарын кэннэ,...
Олоҥхо ыһыаҕар анаан Дьокуускайтан айанныыр паром ахсаана элбэтиллэр
Сонуннар | 14.06.2024 | 10:17
Олоҥхо ыһыаҕар анаан Дьокуускайтан айанныыр паром ахсаана элбэтиллэр
XVII-с өрөспүүбүлүкэтээҕи Олоҥхо ыһыаҕа быйыл бэс ыйын 20-21 күннэригэр Аммаҕа Муона чараҥа айылҕа маанылаах миэстэтигэр ыытыллаары турар.  Ыһыах мааны ыалдьыттарынан өрөспүүбүлүкэ 32 муниципальнай тэриллиититтэн 15 тыһыынчаттан тахса киһи буолуоҕа. Айанньыттарга анаан «Дьокуускай – Аллараа Бэстээх» хайысханан 15 паром сылдьыаҕа, Амма сэлиэнньэтин иһинэн оптуобустар, ыһыах түһүлгэтигэр тиэрдэр шатллар сүүрүөхтэрэ. Түһүлгэҕэ 3...