Туостан туоска кыырайдылар

Бэс ыйын 10 күнүгэр Н.Н. Тарскай аатынан “Туймаада” стадионугар ыытыллыбыт ааспыт үйэ уһулуччулаах атах оонньооччута, Саха сирин норуоттарын уонна Манчаары Баһылай спартакиадаларын элбэх төгүллээх абсолютнай чөмпүйүөнэ, рекордсмена Василий Васильевич Николаев сырдык кэриэһигэр Өрөспүүбүлүкэ чемпионата түмүктэннэ.

 Күрэхтэһии кыттыылаахтарын Манчаары аатынан спорт национальнай киинин дириэктэрэ Геннадий Васильев, “Сахаада-спорт” Ассоциация президенэ Александр Ким-Кимэн, өрөспүүбүлүкэ атах оонньуутугар федерация президенэ Николай Андреев, Бүлүү улууһун баһылыгын солбуйааччы Александр Прокопьев, Ил Түмэн дьокутаата Юрий Николаев, В.В. Николаев дьиэ кэргэнэ, доҕотторо Марк Харлампьев уо.д.а. эҕэрдэлээтилэр. Василий Васильевич Николаев атах оонньуутугар сүдү кылаатын бэлиэтээтилэр. Федерацияны салайбыт Анатолий Анатольевич Добрянцев сырдык аатын ахтан ыллылар. Үгүс көлүөнэ атах оонньооччуларга уһун үйэлэниини көрдөрбүт, 70-80-90 сылларга күрэхтэспит Саха Өрөспүүбүлүкэтин үтүөлээх учуутала Николай Николаевич Адамов 70 сааһынан үтүө-мааны тыллар этилиннилэр.

Күүстээх маастардар түмсэн күрэхтэстилэр. Дьахталларга үс көрүҥ түмүгүнэн Хаҥаластан Валерия Олесова, Мэҥэ Хаҥаластан Анна Лыткина, Уус Алдантан Евгения Адамова (Гоголева); бэтэрээннэргэ Виталий Васильев (Ньурба), Андрей Захаров (Мэҥэ Хаҥалас), Максим Софронов (Нам) туһааннааҕынан бастакы, иккис, үһүс миэстэлэри ылаттаатылар.

Болҕомтону тардар түгэнинэн бэтэрээннэргэ сэттэ ойууга “Сахаада-спорт” маастарын нуорматын ылар иһин күрэхтэһии буолла. Манеж иһинээҕи кыһыҥҥы күрэхтэһиилэргэ “Сахаада-спорт” маастара буолары ситиспит Чурапчыттан Андрей Турантаевка, Өлөөнтөн Николай Семеновка, Үөһээ Бүлүүттэн Василий Санниковка, “Модунтан” Николай Константиновка дастабырыанньалары уонна түөскэ иилиллэр бэлиэлэри Ассоциация президенэ Александр Ким-Кимэн үөрүүлээх быһыыга-майгыга туттартаата.

Онтон бу сайыҥҥы чемпионакка аҕам саастаахтар билигин да тэтиэнэхтэрин, сүһүөхтэрэ уйарын көрдөрдүлэр. Намтан 73 саастаах Федот Соловьев, 61 саастаах Герасим Дьяконов, Амматтан 74 саастаах Василий Кузьмин “Сахаада-спорт” маастара буолары ситистилэр! Федот Соловьев 70 саастаахтар бөлөхтөрүгэр кылыыга 15 м 21 см, үс көрүҥ түмүгүнэн 44 м 51 см түһүтэлээн, өрөспүүбүлүкэ рекортарын олохтоото. Иннокентий Яковлев 2005 сыллаахха олохтообут рекортарын тупсартаата. Василий Кузьмин 14 м 61 см куобахтаан, эмиэ рекорд олохтоото.

Күүтүллүбүтүн курдук, хатыһыылаах киирсиилэр күннэригэр сылдьар эр дьоҥҥо буоллулар. Биирдиилээн көрүҥнэргэ: кылыыга Ньургун Сокольников (44 м 90 см, Уус Алдан), ыстаҥаҕа Кай Адамов (44 м 34 см, Горнай-Чурапчы), куобахха Андрей Васильев (41 м 48 см, Таатта) бастаатылар. Мэҥэ Хаҥаластан Сергей Захаров, Кэбээйиттэн Яков Дмитриев, Ньурбаттан Эрэл Тихонов бириистээх миэстэлэргэ тигистилэр. Үс көрүҥ түмүгүнэн абсолютнай чөмпүйүөн үрдүк аатын Кай Адамов (127 м 39 см) ылары ситистэ, Сергей Захаров (127 м 30 см) иккис, Яков Дмитриев (127 м 06 см) үһүс миэстэлэннилэр.

Кыайыылаахтарга уонна бириистээх миэстэлэргэ тиксибиттэргэ өйдөбүнньүк мэтээллэр, кубоктар, дипломнар, ботуччу харчынан бириистэр туттарылыннылар.