ТОП-10: Саха сирин ситиһиилээх эр бэртэрэ

Александр Ермолаев

Кини – эдэр урбаанньыт. Аһы-үөлү тиэрдэн биэрии сулууспаларын уонна хамсаабат баайы-дуолу атыылыыр агентство хаһаайына. Бэрт көрсүө майгылаах, аһыныгас сүрэхтээх, чахчы, үлэни этинэн-хаанынан таптыыр киһи. Хас даҕаны үрдүк үөрэхтээх, хас даҕаны омук тылынан саҥарар, талааннаах ыччат.

Михаил Кычкин

Ырыаһыт, «Snow Voice» бөлөх урукку солиһа. Биһиги кинини эргиччи талааннаах киһи быһыытынан билэбит. Михаил айар үлэни, үөрэҕи, дьарыгы барытын тэҥҥэ дьүөрэлии тутар. Билигин омук тылларын үөрэтиинэн дьарыктанар, тас дойдулары кэрийэр. Иллэҥ кэмигэр хоһоон суруйан, ырыа таһааран сүгүрүйээччилэрин үөрдэр.

Антон Васильев

Биһиги кинини «Саха» НКИХ иһинэн үлэлиир «АЙАР» ыччат биэриитигэр элбэхтик көрөбүт. Маны таһынан эдэр киһи Саха сирин ыччатын парламенын бэрэссэдээтэлэ буолар. Саха ыччатын политикатыгар элбэх үлэни ыытарын бэлиэтии көрөбүт. Ол курдук сокуон да барылын ылыныытыгар кыттар, олох-дьаһах сайдыытыгар кырата суох кылаатын киллэрэр. Элбэх кыыс сүрэҕин долгутар, кутун тутар.

Вячеслав Дьяконов

Быйылгы Туймаада ыһыаҕар Үс Хатыҥҥа икки күн устата «Дыгын оонньуулара-2023» тыҥааһыннаах күрэҕэ ыытыллыбыта. Бу киирсии түмүгүнэн Эҥсиэли хочотуттан тардыылаах, Мэҥэ Хаҥалас сириттэн силистээх Вячеслав Дьяконов кыайыылаах аатын ылбыта. Санатан эттэххэ, кини быйылгы күрэх кэннэ “Дыгыҥҥа” кыттарын  түмүктээбитэ. Спорду өрө тутар, чөл олоҕу уруйдуур эр бэрдэ билигин М.К. Аммосов аатынан ХИФУ биир тарбахха баттанар ситиһиилээх утудьуона, интэриниэт маҕаһыыннар сөбүлээн түһэрэр моделлара.

Дмитрий Баишев

Дмитрий Баишев – тыйаатыр уонна киинэ артыыһа, «Суорат» бөлөх биир тутаах киһитэ. Мэҥэ Хаҥалас улууһун Төҥүлү нэһилиэгиттэн төрүттээх. Иллэҥ кэмигэр бэйэтин ситимнэригэр кылгас вайннары устар. Көр-нар аргыстаах, дьээбэлээх-хооболоох артыыс айылҕаттан уруһуйдуур талааннаах. Бу туһунан олох аҕыйах киһи билэр буолуохтаах дии саныыбыт. Оттон биһиги хаһыаппытыгар сиһилии суруйан турабыт.

Максим Ю-Ци-Фа

Биһиги кинини блогер, КВН-щик уонна интэриниэт ситимигэр социальнай хабааннаах биэриилэри оҥорон таһаарар киһи быһыытынан билэбит. Билигин киин куорат ыччаттарыгар анаан араас биэчэрдэри,  «Stand-Up” киэһэлэрин тэрийэн, иилээн-саҕалаан ыытар. Олоххо элбэҕи ситиһэр сыаллаах-соруктаах эр бэрдигэр ситиһиилэри баҕарабыт.

Айаал Лазараев

Биллэн турар, биһиги испииһэкпитигэр Айаал Лазарев киирдэҕинэ эрэ табыллар. Бэрт соторутааҕыта Кытайга буолан ааспыт Азия оонньууларыгар боруонса мэтээли ылбыта. Аны билигин Саха сирин бөҕөһө, улахан ыйааһыҥҥа биир баар-суох эрэлбит Олимпийскай оонньууларга бэлэмнэнэр.

Леонид Григорьев – Леон

Ырыаһыт уонна спортсмен уол. Хас даҕаны хит буолбут сахалыы ырыа ааптара. Атах оонньууларыгар Бүлүү улууһун сүүмэрдэммит хамаандатын чилиэнэ. Иллэҥ кэмигэр Леонид сыбаайбаларга, үбүлүөйдэргэ ыллыыр.

Артем Винокуров

Дьокуускай куоракка саамай биллэр кондитер уол. Чахчы, кини астаабыт аһа-үөлэ барыта олус минньигэс. Ордук табыллан тортары, тотоойу бөрүөктэри астыыр. Иллэҥ кэмигэр кинигэ ааҕарын, спордунан дьарыктанарын уонна Сахабыт сирин кэрэ сирдэрин кэрийэрин туохтааҕар даҕаны ордорор.

Семён Ларионов – Кролик Бро

Кини өрөспүүбүлүкэҕэ блогер быһыытынан киэҥник биллэр. Эдэр киһи блог устарын таһынан ыллыыр, хоһоон суруйар, спорду уонна чөл олоҕу өрө тутар. Олус элэккэй майгылаах, куруук үөрэ-көтө сылдьар.