Тохсунньуга 865 кырачаан төрөөтө

2022 сыл бастакы ыйыгар Сахабыт сиригэр 865 оҕо күн сирин көрдө. Бу туһунан өрөспүүбүлүкэ Ил Дархана Айсен Николаев инстаграм страницатыгар иһитиннэрдэ.
“456 уол уонна 409 кыыс оҕо биһиги дойдубут гражданнара буоллулар. Бу өрөспүүбүлүкэбит 100 сыллаах үбүлүөйүн оҕолоро эрэ буолбакка, Саха сиригэр Ийэ сылын бастакы оҕолоро”, - диэн суруйбут Ил Дархан. 
2022 сылга өрөспүүбүлүкэбит Саха АССР тэриллибитэ 100 сылын бэлиэтиир. Маны таһынан Айсен Николаев 2022 сылы Ийэ сылынан биллэрбитэ уонна үбүлүөйдээх сылга төрөөбүт хас биирдии оҕоҕо “Дети столетия” тус сыаллаах хапытаалы анаабыта, манна хас биирдиилэригэр сүүс тыһыынча солкуобай бэриллэр. 
Тус сыаллаах хапытаал бастакы бас билээччилэринэн тохсунньу 1 күнүгэр 00:12 төрөөбүт Амма улууһуттан Николаевтар дьиэ кэргэн буолбуттара. Саҥа сыл бастакы күнүгэр барыта 23 оҕо күн сирин көрбүтэ. 
Ылбыт үптэрин дьиэ кэргэн анал сыалга туттуон сөп. Бу туһунан Үлэ Министиэристибэтэ кимиэхэ ананарын уонна туох сыалга туттулларын быһаарбыта.