ТОБОҔУ - ТУҺАҔА!

Айылҕабытын харыстыыр, ыччаты дойдуга таптал, харыстабыллаах сыһыан тыыныгар иитэр, олохтоох оҥорон таһаарыыны сайыннарар сыалтан Аан дойдутааҕы Сир күнүн көрсө

“ТОБОҔУ – ТУҺАҔА!”

хаартысканан күрэх биллэрэбит!

Күрэх балаһыанньата:

“Тобоҕу – туһаҕа!” күрэххэ хаартыскалары тутуу алтынньы 24 күнүттэн кулун тутар  20 күнүгэр диэри ыытыллар.

Хаартыскалары konkurskiinkuorat@mail.ru электроннай почтанан, 8-914-270-64-04 бассаабынан тутабыт.

Күрэх сыала-соруга:

- Саха сирин экологиятын харыстааһын;

- Оҥорон таһаарыыны сайыннарыы;

- Бөҕү туһаҕа таһаарыы;

- Ыччаты төрөөбүт дойдуга, айылҕаҕа харыстабыллаах сыһыаҥҥа иитии.

Күрэххэ кытталлар:

Күрэххэ 7 сааһыттан ким баҕалаах, олорор сириттэн тутулуга   суох кыттыыны ылар.

Кыттааччыларга ирдэбил:

Кыттааччылар оҥоһуктарын көрдөрөллөрүгэр, үчүгэйдик көстөр үрдүк хаачыстыбалаах хаартыска ыыталлар. Оҥоһугу ким, тугунан, хайдах оҥорбутун толору суруйан, кылгастык билиһиннэрэр тиэкистээх буолуохтаах.

Кэлэктиибинэн кыттыы биһирэнэр.

Күрэххэ көрүллэр оҥоһук көрүҥнэрэ:

Күрэх 3 көрүҥүнэн ыытыллар. Хас биирдии көрүҥҥэ кыайыылаахха анал аат иҥэриллэр.

Көрүҥнэрэ:

– Дьиэҕэ-уокка туттуллар мал-сал;

– Эргэ таҥаһы саҥалыы тыыннааһын;

– Нэһилиэк, улуус, куорат экологиятыгар туһалаах оҥоһук.

Күрэххэ сыаналанар:

– Оҥоһук ураты идеята;

– Туттуллар туһата.

Дүүллүүр сүбэ:

Дьүүллүүр сүбэ экологтартан, экспертэртэн уонна эрэдээксийэ кэлээктиибиттэн талыллан үлэлиэҕэ. Хаартыска 5-бааллынан сыаналанар. Мөккүөрдээх түгэннэргэ дьүүллүүр сүбэ бэрэссэдээтэлин куолаһа быһаарар оруоллаах.

Күрэххэ кыттыыны туоһулуур көҥүллүк суруллар сайаапканы, бэйэҕитин, оҥоһуккутун билиһиннэрэр тиэкиһи уонна хаартыскалары konkurskiinkuorat@mail.ru электроннай почтаҕа ыытаҕыт. 

Күрэх ыытыллар кэмигэр кыттааччылар хаартыскалара “Киин куорат” хаһыакка бэчээттэнэр.  Күрэх түмүгэ аан дойдутааҕы СИР күнүн көрсө “Киин куорат” хаһыакка тахсар.

КУТУЙАҔЫ ОҤОРОБУТ

Кэлэр сыл бэлиэтэ – кутуйах. Туһата суох малтан маннык кутуйахтары оҥоруохха сөп.

Амматтан биһиги  хаһыаппыт эрэллээх ааҕааччылара Табунановтар таҥас сыыһыттан оҥорбут кутуйахтара.