Тимир гараастар оннуларыгар спорткомплекс дьэндэйиэҕэ

Киин куоракка Петр Алексеев уулуссатыгар уруккуттан турбут сүүһүнэн тимир гараастары тиэйэн эрэллэр. "П.Алексеев уулуссатыгар турар уопсастыбаннай гараастар" кэпэрэтиип муниципальнай сиргэ туран кэллэ. Тутуу уонна тырааныспар инфраструктуратын департаменын салайааччытын солбуйааччы Иван Гуляев бу сир учаастагын 400 миэстэлээх элбэх хайысханан үлэлиир спортивнай комплекс тутуутугар биэрбиттэрин иһитиннэрдэ.

"Биһиги кэпэрэтиип чилиэннэригэр гараастара сокуону кэһэн бу сиргэ туралларын иһитиннэрбиппит. Сокуону кэһэр эбийиэктэр "Жилкомсервис" штрафстоянкатыгар барыахтара. От ыйын 5 күнүгэр бу туһунан иһитиннэриилэри тарҕаппыппыт," - диэтэ Иван Гуляев.  

Гараас турарыгар сокуоҥҥа олоҕуран сир бэриллэригэр Гагаринскай уокурук управатыгар эбэтэр олорор сиргитинэн сайаапка түһэрэҕит. 

Оттон штрафстоянкаҕа тиэллибит гараастары бас билээччилэр "Жилкомсервис" Муниципальнай унитарнай тэрилтэттэн ыйыталаһаҕыт.