Тиэргэннэри тупсарыы салҕанар

Бу күннэргэ Дьокуускай куорат баһылыга Евгений Григорьев Октябрьскай уокурукка элбэх кыбартыыралаах дьиэлэр тиэргэннэригэр сылдьан, тупсарыы үлэтин бэрэбиэркэлээтэ. Ол курдук, «Главстрой» МХТ отчуоттаабытынан, Чернышевскай уул., 22/1, 22/2, Аржаков уул., 16, Кулаковскай уул., 4/3 турар эбийиэктэргэ тутуу бэлэмэ 60% тэҥнэспит.

Бордюрдары туруоруу, оҕо балаһааккаларыгар эрэһиинэ кыыбаҕын кутуу үлэтэ, тротуардары уонна ааһар суоллары аспааллааһын  түмүктэммит.

Архитектура дьоҕус пуормаларын алтынньы саҕаланыыта аҕалыахтара. Балаҕан ыйын 21 күнүнээҕи туругунан күрүө, уот тирээбиллэрин туруоруу үлэтэ ыытыллар. Тиэргэннэргэ уу ааһар лотуоктарын оҥоруохтара.

Көрсүһүүгэ кэлбит олохтоохтор территорияны тупсарыыга уонна тротуары оҥорууга баҕа санааларын, ону сэргэ үлэ сорох итэҕэстэрин бэлиэтээн эттилэр. Онуоха бэдэрээтчит ыытыллыбыт үлэ барыта мэктиэлээҕин санатта, ыйыллыбыт итэҕэстэри туоратыахпыт диэн эрэннэрдэ. Көхтөөх олохтоохтору үлэни туттарыы кэмигэр ыҥырыахтара.   

Санатан эттэххэ, тиэргэннэри тупсарыы «Уһук Илиҥҥэ 1000 тиэргэн» федеральнай бырайыагы олоххо киллэрии чэрчитинэн, «2020-2024 сылларга Дьокуускай куорат сиригэр-уотугар аныгы куорат эйгэтин тэрийии» бырагырааманан ыытыллар. 

Быйыл киин куорат араас уокуруктарыгар 15 элбэх кыбартыыралаах дьиэ тиэргэнэ өрөмүөннэнэр уонна тупсарыллар. Инники үс сылга барыта 129 тиэргэн өрөмүөннэннэ.

Хаартыска: yakutskcity.ru саайт