«Тиэргэн бырааһынньыктара» сайын устата ньиргийиэхтэрэ

«Уокуруктарга олорор дьон бары биир дьиэ кэргэн курдуктар. Кинилэри түмэр уонна сомоҕолуур тэрээһиннэр олус туһалаахтар – ханнык баҕарар кыһалҕалаах боппуруоһу биир сүбэнэн кыайыахтарын сөп. Онон “Тиэргэн бырааһынньыга” култуурунай бырагыраама быһыытынан саататарын таһынан, улахан дьону эмиэ түмэр күүс буолла”,– диир Строительнай уокурук уопсастыбанньыга Кирилл Соболев.

Бу тэрээһиннэргэ уокурук олоҕор көхтөөх кыттыыны ылар дьоҥҥо  махтал суруктары уонна грамоталары туттараллар, үлэлэрин биһирииллэр уонна оҕолорго көрдөөх-нардаах бырааһынньыгы бэлэхтииллэр.

“Биһиги олохтоохторбут – олорор сирбит сайдыытын түстүүр дьон. Тиэргэнинэн, дьоҕус оройуонунан түмсүүлээх буоллахха эрэ барыта уурбут-туппут курдук сатанан иһэрин олох бэйэтэ көрдөрдө. Оҕолорбут доҕордоһоллор, кыбартыыралар, подьездтар хаһаайыттара түмсэбит, сүбэбитин холбуубут. Биһиги бырааһынньыкпытыгар 1000-тан тахса киһи кэлэ сырытта. Онон кылгас сайыммытын сэргэхситэр өссө биир чаҕылхай бырааһынньыктаммыппыт наһаа үчүгэй!” – диэн 203-с дьоҕус оройуон Старосталарын сэбиэтин бэрэссэдээтэлэ Наталья Луковцева санаатын үллэһиннэ.

«Птицефабрикаҕа» Дьиэ кэргэн күнүн бэлиэтээтилэр

От ыйын 8 күнүгэр бэлиэтэнэр Дьиэ кэргэн күнүн киин куоракка быйылгыттан саҥа тэриллэр “Тиэргэн бырааһынньыгын” кытта ситимнээтилэр.

Ол курдук, Автодорожнай уокурукка бырааһынньык икки сиргэ – “Птицефабрикаҕа” уонна “Прометейга” буолан ааста.

Птицефабрика оройуонугар 6-с нүөмэрдээх дьиэ тиэргэнигэр ырыа-үҥкүү, көр-нар көҕүлүттэн тутулунна. Бу тиэргэн федеральнай бырагыраамаҕа хапсан тупсарыллыбыта.

«Куорат хаһаайыстыбатын үлэлэтэр сулууспа» МХТ дириэктэрэ Владимир Аммосов бэлиэтээбитинэн, былырыын 6-с нүөмэрдээх тиэргэн өрөмүөннэммит буоллаҕына, быйыл ыаллыы сытар тиэргэн оҥоһуллан эрэр. Тиэргэни тупсарыыга олохтоохтор быһаччы кыттыыны ылбыттар – түмсэн хаста да субуотунньуктарга тахсыбыттар, мас, ыарҕа арааһын олордубуттар. Тиэргэн сирэ аспаалламмыт, киирии суоллар оҥоһуллубуттар, оҕо балаһаакката уонна спортивнай тээбириннэр турбуттар.

Олохтоохтор өрөмүөннэммит тиэргэннэринэн олус астыналларын, кинилэр оройуоннарын оҕолоро бары бу балаһааккаларга кэлэн оонньууларын кэпсииллэр. Кыра оҕолорго балаһаакка эрэ буолбакка, обургу оҕолорго сөптөөх тренажердар баар буолбуттарын ордук хайҕыыллар – футбол, баскетбол, волейбол оонньуур сирдэнэн абыраммыттар.

Киин уокуруктар түмсүүлээхтэр

Киин уокурукка “Тиэргэн бырааһынньыга” эмиэ Дьиэ кэргэн күнүгэр ананна.

“Тиэргэн бырааһынньыга” дьоммутун түмэргэ, иллээх-эйэлээх ыаллыы олоҕу түстүүргэ тирэх буолар. Маннык бырааһынньыктар уокурук аайы сыллата ыытыллар буолуохтара диэбиттэрэ үөрдэр”,– диир Киин уокурук көхтөөх олохтооҕо Светлана Чусовская.

Бырааһынньыкка уокурук талааннаах олохтоохторо кэнсиэр көрдөрдүлэр, оҕолорго көр-нар тэрилиннэ, актыбыыстары чиэстээтилэр.

Октябрьскай уокурукка элбэх оҕолоох дьиэ кэргэни чиэстээтилэр

Октябрьскайга “Тиэргэн бырааһынньыгар” 11 оҕолоох Альбина Михайловна уонна Алексей Анатольевич Проценколары эҕэрдэлээтилэр.

Куорат дууматын бэрэссэдээтэлин бастакы солбуйааччыта Евдокия Евсикова кэпсээбитинэн, быйыл Дьокуускай куорат Дууматын дьокутааттарын көҕүлээһиннэринэн саҕаламмыт “Тиэргэн бырааһынньыктарын” сыл аайы ыытар буолуохтара. Бастатан туран, бу тэрээһин олохтоохторго доҕордуу сыһыаны олохтуур сыаллаах-соруктаах.

Бу дьоро күн дьоруойдара буолбут Проценколар ыал буолан олорбуттара 30 сылын туолбут, кинилэр 11 төрөппүт уонна иитиэх оҕолоохтор, 3 сиэннээхтэр. “Маннык уһуннук иллээхтик бииргэ олоруу кистэлэҥэ тугуй?” диэн ыйытыыга дьоро күн дьоруойдара: “Саамай сүрүнэ – бэйэ-бэйэни ытыктаһыы, тапталы бүөбэйдээһин уонна дьиэ кэргэн хас биирдии киһитин итэҕэстэрин хайдах баарынан ылыныы”,– диэн санааларын үллэһиннилэр.

Уокурук управатын салайааччыта Валентин Эверстов кэпсээбитинэн, уокурукка 127 оҕо балаһаакката баар, сайын устата “Тиэргэн бырааһынньыга” 10 сиргэ ыытыллыаҕа.

«Тиэргэн бырааһынньыктара» сыл аайы ыытыллыахтара

Гагаринскай уокурукка “Тиэргэн бырааһынньыга” Кузьмин уул., 28/3 тэлгэһэтигэр буолан ааста.

Бириистээх күрэхтэһиилэр, ырыа-тойук, көрдөөх оонньуулар эмэниттэн эдэригэр тиийэ дьону угуйдулар. 20 сылтан уһуннук бииргэ олорбут 5 ыалы чиэстээтилэр.

Уокурук көхтөөх олохтооҕо, 2-с нүөмэрдээх балыыһа кылаабынай бырааһа Саргылана Васильева бырааһынньыгы тэрийэргэ көмөлөспүт, өйөбүл буолбут дьоҥҥо уонна уокурук управатыгар махталын биллэрдэ, маннык бырааһынньыктары атын да тиэргэннэргэ салҕыы тэрийиэхпит диэн эрэннэрдэ.

Строительнайга үс бырааһынньык буолан ааста

Строительнай уокурукка уопсастыбанньыктар күүстэринэн үс сиргэ “Тиэргэн бырааһынньыга” буолан ааста. Сүрүн болҕомтону уонна тэрээһиннэри оҕолорго анаатылар – идэтийбит аниматордары ыҥыран оонньоттулар.

Бырааһынньыгы тэрийбит уокурук уопсастыбанньыга Кирилл Соболев чөл олоҕу пропагандалыыр киһи быһыытынан биллэр. Кини көҕүлээһининэн куоракка «Я расту со спортом» обургу оҕолору түмэр кулууп үлэлиир, 5 сыл устата 4000 оҕону хабан, чэбидигирдэр үлэ ыытыллыбыт.

 «Мин бу уокурук кырдьаҕас олохтооҕобун. Урут бу оройуоҥҥа бары сирэй билсэр эбит буоллахпытына, кэлин ол сүппүтэ. Ол иһин дьону сэргэхситэр, бэйэ-бэйэлэрин билиһиннэрэр, түмэр маннык бырааһынньыктар наһаа наадалаахтар эбит. Тэрийээччилэргэ махтанабыт»,– диэтэ биэнсийэлээх Светлана Филимонова.

***

“Тиэргэн бырааһынньыктара” аны күһүҥҥүгэ диэри хас уокурук аайы ыытыллыахтара. Быйылгы бырааһынньыктар спонсордара, тэрээһиҥҥэ кыттыһыан баҕалаах уопсастыбанньыктар үгүстэр. Эһиил уопсастыбанньыктар бу баҕа санаалара, быйылгы курдук өрө күүрүүлээх турунуулара уҕараабатыгар баҕарыаҕыҥ.