«Теплоэнергия» АУо олохтоохторго 2,3 мөлүйүөн солкуобайы төннөрдө

СӨ Тутууга уонна дьиэҕэ-уокка судаарыстыбаннай хонтуруолга управлениетын дьаһалынан оттук иһин төлөбүртэн 2,3 мөлүйүөн солкуобай олохтоохторго төнүннэ. 
2020 сыл сэтинньи ыйыгар тустаах управление Сэргэлээх уул. 2/5 №-дээх элбэх кыбартыыралаах дьиэ олохтооҕуттан 2019 сыллааҕы оттук иһин төлөбүр көннөрүүтэ оҥоһуллубатаҕын туһунан үҥсүү киирбитэ. 

Бэрэбиэркэ көрдөрбүтүнэн, «Теплоэнергия» АУо 354 №-дээх коммунальнай өҥөлөрү оҥорор Быраабыла 42 (1) пуунун кэһэн, дьиэҕэ сылааһы кээмэйдиир тэрил баарын үрдүнэн, 2019 сыл балаҕан ыйыттан 2020 сыл ыам ыйыгар диэри оттук төлөбүрүн норматив быһыытынан ааҕа олорбут. Онуоха 2019-2020 сыллардааҕы оттук кэмигэр 25,3 тыһыынча солкуобайы көҕүрэтэн, хат суоттааһын оҥоһуллубатах. 
Управление дьаһалынан «Теплоэнергия» АУо төлөбүрү хат суоттаан 2019-2020 сыллардааҕы оттук кэмин иһин дьиэҕэ бүтүннүүтүгэр 2,3  мөлүйүөн солкуобай төннүбүт. 
«Бэрэбиэркэ түмүгүнэн оттук иһин төлөбүр 18,5 саҕалаан 50 тыһыынча солкуобайга диэри көннөрүлүннэ», – диэтэ Тутууга уонна дьиэҕэ-уокка судаарыстыбаннай хонтуруолга управлениетын салайааччыта Павел Аргунов.