Технологическай бэстибээлгэ кыттыыны ылыҥ!

Ахсынньы 11-12 күннэригэр Наука уонна технология сылын чэрчитинэн  “Арассыыйа – мин историям” историческай пааркаҕа “Тымныы.NET” Саха сиринээҕи технологическай бэстибээл ыытыллыаҕа. Тэрээһин Арассыыйаҕа куруһуоктар хамсааһыннара тэриллибитэ 100 сылыгар ананар.

Технологическай энтузиастары, оскуола үөрэнээччилэрин уонна устудьуоннары түмэр сыаллаах тэрээһин киэҥ араҥаҕа инновациялары, саҥа сүүрээннэри билиһиннэриэҕэ. Бу күннэргэ куруһуоктар, тэрилтэлэр, идэтийбит үлэһиттэр маастар-кылаастары ыытыахтара. Куруһуоктар хамсааһыннарын регионнарга сайыннарыы суолун тобулар сессиялар буолуохтара, бастыҥ куруһуоктар салайааччыларын бэлиэтиэхтэрэ. “Будущее обыденно” туспа трек быһыытынан бырайыак үлэлиэҕэ.

Тэрийээччилэр иһитиннэрэллэринэн, “Тымныы.NET” бэстибээл саамай аныгы, ураты бырайыактары олоххо киллэрэр балаһаакка буолуоҕа, талааннаах ыччаты уонна уопуттаах настаабынньыктары ситимниэҕэ.

Маннык хабааннаах Национальнай технологическай көҕүлээһиннэр бэстибээллэрэ Арассыыйа 9 регионугар ыытыллаллара былааннанар. Тэрийээччилэринэн Ыччат, Үөрэхтээһин, Инновация министиэристибэлэрэ уо.д.а. буолаллар.

Бэстибээл регионнааҕы бэрэстэбиитэлинэн “Юные якутяне” ресурснай киин буолла, кыттааччылары уонна көрөөччүлэри регистрациялааһын бэстибээл сайтыгар ыытыллар: https://future-expo-fest.ru/

#ФестивалиКружковогоДвижения #КружковоеДвижение #НТИ #БудущееОбыденно #ТымныыNET #ЯТФ