Театрдарга уонна циркэҕэ тепловизордары туруораллар

Бу күннэргэ киин куоракка култуура тэрилтэлэригэр киһи этин температуратын кээмэйдиир тепловизордары туруораллар.

Анал оборудование бастакынан Пушкин аатынан нуучча академическай театрыгар баар буолла. Маны сэргэ, Саха театрыгар, Опера уонна балет театрыгар уонна Саха циркэтигэр туруоруохтара. 

Бу тэрил 5 киһи температуратын тэҥинэн кээмэйдиир кыахтаах, ону тэҥэ араас тимири булар детектор быһыытынан эмиэ үлэлиир. Сыаната ортотунан 700 тыһыынча солкуобайга тэҥнэһэр.

Култуура миниистирин бастакы солбуйааччы Владислав Левочкин иһитиннэрбитинэн, ордук элбэх көрөөччү сылдьар тэрилтэлэригэр өрөспүүбүлүкэ бүддьүөтүттэн субсидия суотугар маннык тепловизордары туруордулар. Кини эппитинэн, СӨ култуураҕа уонна духуобунай сайдыыга министиэристибэтин этиитин Бырабыыталыстыба өйөөбүт.

Анал тэриллэри спорт тэрилтэлэригэр уонна Өксөкүлээх Өлөксөй аатынан Норуоттар доҕордоһууларын дьиэтигэр туруоруохтара.