Табыллыбатах уоппуска

Алдан оройуонун полициятыгар массыанньыктартан албыннаппыт Томмот олохтооҕо үҥсүү түһэрбит. Бу туһунан РФ ИДьМ пресс-сулууспата иһитиннэрэр.

Эмсэҕэлээбит дьахтар быһаарбытынан, дьиэ кэргэнинэн Краснодарскай кыраайга уоппускаларыгар сынньана бараары тэриммиттэр. Билиэт сыаната Дьокуускай – Краснодар – Дьокуускай түөрт киһиэхэ 260 000 солкуобай эбит, онон ыал ийэтэ арыый чэпчэки билиэти көрдөөбүт.

“Инстаграмҥа дьахтар 20 бырыһыан чэпчэтиилээх көтөр аал билиэтин интэриэһиргээбит”, – диэн иһитиннэриигэ этиллэр.

Биллэриини чинчийэн дьахтар биллибэт сайтка тиийбит, онно анал түннүккэ бэйэтин дааннайдарын уонна төлөпүөнүн нүөмэрин суруйан хаалларбыт.

Сотору кэминэн киниэхэ биир эр киһиттэн иһитиннэрии кэлбит, кини хампаанньа менеджерэ буоларын эппит уонна билиэт сыаната 170 500 солкуобай буолар диэбит. Биллэн турар, дьахтар үөрбүт, сүүсчэкэ тыһыынчанан чэпчэки билиэти буллум диэн.

Массыанньык дьахтартан докумуоннарын куоппуйатын көрдөөбүт уонна баан реквизиттэрдээх дуогабарга харчытын ыытарыгар соруйбут. Дьахтар тугу эппиттэрин барытын толорон, харчытын халтайга ыыппыт. Биллэн турар, ханнык да билиэт кэлбэтэх, онуоха дьахтар албыннаппытын билэн полицияҕа тыллаабыт.