Табаҕа оскуолатыгар «Герой паартата» арылынна

Росгвардия Саха сиринээҕи управлениетын «Бизон» ОМОН сотруднига, полиция сержана Александр Гундарев аатынан «Герой паартатыгар» туйгун үөрэхтээх уонна оскуола олоҕор көхтөөхтүк кыттар үөрэнээччилэр олорор бырааптаахтар.

«Герой паартата» үөрүүлээх быһыыга-майгыга аһыллыытыгар оскуола уонна Табаҕа сэлиэнньэтин дьаһалталара, куорат баһылыгын солбуйааччы Владимир Аржаков, Росгвардия Саха сиринээҕи управлениетын начаалынньыгын байыаннай-политическай үлэҕэ солбуйааччы, полковник Никита Воробьев, «Бизон» ОМОН салалтата уонна бэтэрээннэрэ, анал байыаннай дьайыыга баҕа өттүнэн кыттар «Боотур» этэрээт бэрэстэбиитэллэрэ, Александр Гундарев чугас дьоно кытыннылар.

Паартаҕа бастакынан 10 кылаас туйгун үөрэнээччитэ, Юнармеец килбиэнин III-с степеннээх бэлиэтин хаһаайына Владимир Акреев уонна 9 «б» кылаас үөрэнээччитэ, «Азия оҕолоро» норуоттар икки ардыларынааҕы оонньуулар чемпионкалара Аксинья Панова олорор чиэскэ тигистилэр.

Тэрээһиҥҥэ Табаҕа орто оскуолата уонна Росгвардия Саха сиринээҕи управлениета бииргэ үлэлиир туһунан сөбүлэҥи түһэристилэр.