06.04.2023 | 18:00

Таҥаһы сөпкө сууйтарыҥ

Таҥас сууйар аптамаат массыына – дьиэҕэ-уокка бастыҥ көмөлөһөөччү. Бороһуогу, араас сириэстибэни (кондиционер, таҥаһы маҥхатар, бээтинэни сүтэрэр) кутар анал лотуогар тоҕо үс тус-туспа уйалаах буоларый? Ону билбэт киһи таҥаһы кондиционерынан сууйуон, бороһуогунан сайҕыан сөп.
Таҥаһы сөпкө сууйтарыҥ
Ааптар: Айыына КСЕНОФОНТОВА
Бөлөххө киир

Барабааныгар кутуохха сөп дуо?

Сорохтор таҥас сууйар сириэстибэни массыына барабааныгар да кутуохха сөп дии саныыллар. Лотуок мээнэҕэ оҥоһуллубатаҕа чуолкай. Массыына холбонноҕуна, онно кутуллубут бороһуок суураллар уонна күүгэнирэр, онтон биирдэ кирдээх таҥастаах барабааҥҥа тиийэр. Ону сэргэ, массыына ханнык эрэсиими талбыккынан, таҥаһы буортулаабат курдук, сириэстибэни сөпкө тарҕатан биэрэр.

Оттон тута барабааҥҥа куттахха, таҥаска бороһуок суола хаалыан эбэтэр өҥнөөх гранулалара олох даҕаны бээтинэҕэ кубулуйуохтарын сөп. Оччоҕуна хос сууйар түбүккэ түһүөххүт.

Эбэн эттэххэ, барабааҥҥа кутуллубут бороһуок, таҥаһы сууйбакка, туох да көдьүүһэ суох суураллыан сөп. Тоҕо диэтэххэ массыына үлэлиир кэмигэр уутун хаста даҕаны уларытар, ол иһин бороһуок сорҕото таах мээнэ курдары ааһа туруон сөп.

Анал капсулалары уонна таблеткалары кирдээх таҥастаах барабааҥҥа кутуохха сөп (кэннин диэки угар ордук). Бороһуоктан быдан сыаналаах буолаллар, биирдэ эрэ туттуллаллар, ол эрээри таҥаһы бэркэ сууйаллар.

Тоҕо үс уйалааҕый?

Бороһуогу, араас сириэстибэни (кондиционер, таҥаһы маҥхатар, бээтинэни сүтэрэр) кутар лотуок үксүн массыына куорпуһун иннигэр, хаҥас өттүгэр баар буолар. Ирдэбил быһыытынан үс уйалаах, хас биирдиитэ туспа бэлиэлээх. Ол хайдах суруллара массыына мааркатыттан тутулуктаах. Чэ, эрэ, мантан салгыы лотуок уйаларын өйдөөн-дьүүллээн көрүөххэ уонна сатаан быһаарсар буолуохха.

 

1 №-дээх (1 сыыппара эбэтэр А буукуба)

Бу – таҥаһы барыллаан сууйууга аналлаах, илиинэн сууйууну солбуйар. Хаппырыыс матырыйааллаах таҥаска буортуну оҥорбот, кир иҥмит, эргэ бээтинэ баар буоллаҕына, барсар. “Предварительная стирка” диэн эрэсиимҥэ массыына ууну 30 °C диэри сылытар, онтон мантан анал сириэстибэни ылар уонна барабаанын оргууй үлэлэтэн барар.

Оҥорон таһаарааччылар 1 №-дээх уйаҕа 1 остолобуой ньуоска бороһуогу кутар ордук диэн сүбэлииллэр. Барыллаан сууйуу наада буолар эрэ түгэнигэр, манна сириэстибэни кутуллар. 

 

2 №-дээх (1 сыыппара эбэтэр В буукуба)

Бу уйа саамай элбэхтик туттуллар. Манна бороһуогу эбэтэр гель курдук убаҕас сириэстибэни кутуллар. Ону таһынан, бээтинэни сүтэрэр, таҥаһы маҥхатар эбиллэр. Хас биирдии эрэсиимҥэ сөптөөх сириэстибэ туттуллуохтаах диэн өйдүөхтээхпит. Төһөнөн элбэҕи кутабыт да, оччонон ыраастык сууйар дии саныыр сыыһа. Анал ыстакаанынан, ньуосканан туттар ордук.

 

3 №-дээх (хаар, сулус эбэтэр сибэкки ойуулаах)

Бу уйа убаҕас сириэстибэни (кондиционер, таҥаһы сымнатар, антистатик) кутарга аналлаах. Массыына сириэстибэни мантан таҥаһы сайҕыыр түһүмэҕэр биирдэ ылар, ол иһин маҥхатары кутар туһата суох – “үлэлиир” бириэмэтэ тиийбэт буолан, таҥаска иҥэн хаалыаҕа. Бэлиэтээн эттэххэ, кондиционер бороһуогу солбуйбат, сууйуу хаачыстыбатын, таҥас сытын тупсарар эрэ аналлаах.

Нуорматтан элбэх кондиционеры куттахха, таҥас быыһыгар олохсуйан хаалыан сөп. 4-5 кг таҥаска 35 мл кондиционер (1 хаппах) сөп буолар.

 

Бутуйан кэбистэххэ?

Туох да улахан иэдээн тахсыбат. Массыына алдьаммат, уруккутун курдук үлэлиэҕэ. Ол эрээри таҥас сөпкө сууйуллубат, туттар сириэстибэ туһата суохха баранар. Холобур, бороһуок кондиционер миэстэтигэр кутулуннаҕына, таҥаскыт бороһуога суох сууйуллуоҕа, мыылалаах тымныы ууга сайҕаныаҕа. Өскөтүн бороһуогу барыллаан сууйуу салаатыгар кутан боростуой эрэсиими холбоотоххо, таҥас эмиэ сириэстибэтэ суох сууйуллуоҕа. 

 

Түмүк

Таҥас сууйар массыына лотуогун үчүгэйдик үөрэтэн баран туттуҥ. Маны сэргэ, лотуогу сөп буола-буола хостоон таһааран ыраастыыр буолуҥ. Итиэннэ таҥас сууйуллан, массыына үлэлээн бүппүтүн кэннэ барабаанын уонна лотуогун аһаҕас хаалларан куурдар ордук.

Сонуннар

Ордук ааҕаллар

Полина Победа:  «Дьоллоох буолуҥ олоххутугар, түүлгүтүгэр»
Дьон | 29.02.2024 | 10:00
Полина Победа: «Дьоллоох буолуҥ олоххутугар, түүлгүтүгэр»
Бүгүҥҥү ыалдьыппын улаханнык билиһиннэрэр да наадата суох буолуо. Кинини, өрөспүүбүлүкэ сахалыы тыллаах олохтоохторо ПОЛИНА ПОБЕДА диэн ааттаах хоһоонньуту, социальнай ситим устун билбиттэрэ ыраатта. Полина Пантелеймоновна Находкина хомоҕой тыллаах хоһоонноро элбэх киһи кутун туталлар, махталын ылаллар. Кини ону таһынан имигэс үҥкүүһүт, шпагат түһэр, араас эрчиллиилэри холкутук оҥорор, төбөтүн оройугар турар –...
Ким? Төһө? Туохха?
Сонуннар | 17.02.2024 | 12:00
Ким? Төһө? Туохха?
Ааҕааччыларбытын кытта Сахастат ааспыт 2023 сыл түмүгүнэн таһаарбыт өрөспүүбүлүкэбит социальнай-экономическай туругун кэккэ чахчыларын кытта үллэстэбит.
Ыар сүтүк
Дьон | 17.02.2024 | 16:00
Ыар сүтүк
Үүммүт саҥа сылга Баатара нэһилиэгэ уонна Мэҥэ Хаҥалас улууһа эрэ буолбакка, бүттүүн өрөспүүбүлүкэ ыар сүтүктэннэ.
Сүүтүк саҕа сүбэлэр
Тускар туһан | 17.02.2024 | 10:00
Сүүтүк саҕа сүбэлэр
Бүгүҥҥү нүөмэрбэр хаалбыт 25 сүбэни бэчээттиибин. Ааҕан туһаныаххыт диэн эрэнэбин, олоххут куруук күөх хонуунан аастын, күҥҥүт чэмэлийэ тыктын, дьоллоох-соргулаах буолуҥ!